Putindən Trampa ilginc hədiyyə: İçində dinləmə cihazı var?
Kreml Rusiya Prezidenti Vladimir Putinin ABŞ dövlət başçısı Donald Trampa onun portretini hədiyyə etdiyini təsdiqləyib.
Crossmedia.az xəbər verir ki, bu barədə “Alarabiya News” yazıb.
Rusiya prezidentinin sözçüsü Dmitri Peskovun sözlərinə görə, Putin bu ayın əvvəlində Moskvada Trampın xüsusi nümayəndəsi Stiv Vitkoffa hədiyyəni təqdim edib. Peskov bu barədə əlavə şərh verməkdən imtina edib.
Qeyd edək ki, Vitkoff Rusiya rəsmiləri ilə Ukrayna müharibəsini dayandırmaq üçün aparılan danışıqlardan sonra Putinlə görüşüb. Atəşkəs danışıqları bazar ertəsi Səudiyyə Ərəbistanında davam edib. Burada ABŞ rəsmiləri əvvəlcə rusiyalı həmkarları ilə, daha sonra isə ukraynalı nümayəndələrlə görüşüblər.
Karlsona verdiyi müsahibədə Vitkoff Putinin hədiyyəsini nəcib jest kimi qiymətləndirib və Putin tərəfindən ötən il Trampın Pensilvaniyadakı mitinqdə güllələnməsi hadisəsinə istinad edib. Vitkoffun sözlərinə görə, Putin Tramp üçün dua etdiyini bildirib və onu dostu olduğunu diqqətə çatdırıb.
Bu, Putin tərəfindən Trampa verilən ilk hədiyyə deyil. 2018-ci ildə Rusiya lideri ona futbol topu hədiyyə etmişdi. ABŞ Gizli Xidməti həmin topun içərisində dinləmə cihazlarının olub-olmadığını yoxlamışdı. Tramp isə topu oğluna bağışlamışdı.
Bildirək ki, ABŞ diplomatlarına sovet dövründə hədiyyə edilən bəzi əşyaların casusluq məqsədilə istifadə edildiyi məlumdur. 1945-ci ildə Sovet məktəblilərinin ABŞ səfiri Averell Harrimana hədiyyə etdiyi Böyük ABŞ Möhürünün oyma təsviri illərlə sovet kəşfiyyatı tərəfindən dinləmə cihazı kimi istifadə olunmuşdu.
Putinin Trampa verdiyi portretin dinləmə cihazları baxımından yoxlanılıb-yoxlanılmadığı məlum deyil. Ağ Ev isə hədiyyə ilə bağlı hələlik açıqlama verməyib.
Tramp Putindən hədiyyə alan ilk ABŞ prezidenti deyil. 2021-ci ildə Putin o zamankı prezident Cozef Baydenə Cenevrədə keçirilən sammitdə 12 min dollarlıq lakla işlənmiş yazı qutusu və qələm bağışlamışdı. 2013-cü ildə isə sabiq prezident Barak Obamaya çini boşqablar və espresso fincanları göndərmişdi.
Putin ABŞ prezidentlərinə portret hədiyyə etmək ənənəsini də davam etdirir. 2014-cü ildə o, keçmiş prezident Corc H. W. Buşun 90 illik yubileyində ona portretini göndərmişdi.
Xumar Emilqızı
23:08 01.04.2025
Oxunuş sayı: 9257
