Putin Zelenskini aradan götürməyə çalışır: Maksimum və minimum hədəf açıqlandı
Putin Ukraynaya nəzarət etmək üçün Zelenskinin gedişinə çalışır.
Crossmedia.az xəbər verir ki, bu barədə "The Moscow Times" nəşri iki vəzifədə olan diplomata və Kremlən yaxın mənbələrə istinadən bildirib.
Qeyd olunub ki, maksimum hədəf – Kiyevin kapitulyasiyası, hakimiyyətin dəyişdirilməsi, Ukrayna dövlətçiliyinin Moskvanın şərtlərinə uyğun yenidən qurulması və ölkənin Belarus kimi tam asılı vəziyyətə salınmasıdır. Minimum hədəf isə Rusiyanın nəzarətində olan dörd bölgəyə tam nəzarətin təmin edilməsi və eyni zamanda Kiyevin siyasi və hərbi müstəqilliyinin məhdudlaşdırılmasıdır.
Hazırda Kremlin əsas strategiyası Zelenskinin danışıqlar üçün uyğun tərəf olmadığını ABŞ Prezidenti Donald Trampa nümayiş etdirməkdir. Kremlin yaxın mənbəsinin sözlərinə görə, Moskva Vaşinqtondan Kiyevə güclü təzyiq göstərməsini və Ukraynada prezident seçkilərinin keçirilməsini təmin etməsini istəyir. Mənbə bildirir ki, Zelenski Rusiya ilə ərazi güzəştlərinə getməyəcək. Buna görə də Kreml onun istefasını əsas hədəf kimi görür.
Mənbələrin sözlərinə görə, Putin Zelenskiyə qarşı şəxsi antipatiya bəsləyir. "O, Putinə meydan oxuyub. Bizim məqsədlərimizdən biri onun bir daha Ukraynaya rəhbərlik etməməsini təmin etməkdir. Buna görə də, onun qeyri-legitim olması və seçkilərin keçirilməsinin vacibliyi barədə təbliğat aparırıq", – deyə rusiyalı diplomat bildirib.
Kremlin planı Zelenskinin yenidən seçilməyəcəyinə əmin olmaq və ABŞ-ni Ukraynada hakimiyyət dəyişikliyinin zəruriliyinə inandırmaqdır.
Hazırda Putin Zelenski hakimiyyətdə qaldığı müddətdə heç bir güzəştə getmək niyyətində deyil. "İndi edilən hər hansı bir güzəşt Zelenskiyə verilən hədiyyə kimi görünəcək, Trampa yox. Bu isə qəbuledilməzdir", – deyə rusiyalı diplomat vurğulayıb.
Xumar Emilqızı
13:23 01.04.2025
Oxunuş sayı: 6411
