Paşinyan "Vətəndaş Müqaviləsi"ndə təmizliyə hazırlaşır
Ermənistanın Baş naziri Nikol Paşinyan hakim komandada ciddi dəyişikliklər etməyə hazırlaşır. Bildirilir ki, o, “Vətəndaş Müqaviləsi” (VM) Partiyasının son seçkilərdəki uğursuzluğundan narazıdır və 2026-cı il seçkiləri öncəsi reytinqini yüksəltmək üçün müəyyən addımlar atmağı planlaşdırır.
Crossmedia.az xəbər verir ki, bu barədə Ermənistanın “Graparak” nəşri məlumat yayıb.
Məlumata görə, Paşinyan parlament fraksiyasında da dəyişikliklər edə bilər. Xüsusilə, Andranik Koçaryan və Vilen Qabrielyanın vəzifədən uzaqlaşdırılması gözlənilir.
Qeyd olunur ki, partiya üzvlərini daha çox Qabrielyanın Gümrüdəki qeyri-adekvat davranışı deyil, onun 2026-cı ildə hakimiyyətin dəyişəcəyi ilə bağlı bəyanatı narahat edib. VM üzvləri ehtimal edirlər ki, Qabrielyan xüsusi tapşırıqla Gümrüyə göndərilib və onun hərəkətləri partiyanı gözdən salmağa yönəlib. Partiyanın idarə heyəti yaxın günlərdə bu məsələni müzakirə edəcək.
Partiya daxilində bir çoxları hesab edir ki, Gümrüdəki məğlubiyyət onların fəaliyyətindən yox, məhz Paşinyanın həyata keçirdiyi siyasətdən qaynaqlanır. “Vətəndaş Müqaviləsi”nin reytinqinin kəskin aşağı düşdüyü açıq şəkildə etiraf olunur. Məhz buna görə də Paşinyan son seçki kampaniyasının yekun tədbirində iştirak etməyib ki, partiyanın məğlubiyyəti onunla əlaqələndirilməsin.
Fatimə Məmmədova
12:05 01.04.2025
Oxunuş sayı: 6318
