Ermənistan və Türkmənistan arasında qaz tədarükü ilə bağlı danışıqlar aparılır
Ermənistan hökuməti Türkmənistanla qaz tədarükü ilə bağlı aparılan danışıqların təfərrüatlarını açıqlayıb.
Crossmedia.az xarici mənbəyə istinadən xəbər verir ki, “Türkmənqaz” dövlət konserni İran vasitəsilə Ermənistana illik 600 milyon – 1 milyard kubmetr qaz tədarük etməyə hazırdır.
Eyni zamanda, türkmən qazının Ermənistan ərazisindən Gürcüstana tranziti məsələsi də müzakirə olunur.
Lakin Ermənistan hökumətindəki mənbələr bildirirlər ki, Türkmənistan qazın min kubmetrini uzunmüddətli müqavilə əsasında 490 dollara satmaq istəyir. Danışıqlar nəticəsində bu qiymət 470 dollara endirilsə də, bu məbləğin hələ də yüksək olması razılaşmanın əldə olunmasını çətinləşdirir. Müqayisə üçün, Rusiya Ermənistana qazın min kubmetrini 165 dollara satır.
Hazırda Ermənistan hər il 2,5 milyard kubmetrdən çox qaz idxal edir. Bunun 80-85%-i Rusiya qazının, qalanı isə İrandan alınan qazın payına düşür. Türkmən qazının mövcud şərtlərlə alınması Ermənistan daxilində enerji qiymətlərinin kəskin artmasına səbəb ola bilər.
19:47 31.03.2025
Oxunuş sayı: 915
