İspaniya: "Ukraynanın suverenliyini təmin etməyən planı qəbul etməyəcəyik"
Madriddə Avropa İttifaqı (Aİ) ölkələrinin – Fransa, İspaniya, İtaliya, Polşa, Almaniya, Böyük Britaniya və Ukraynanın xarici işlər nazirləri təhlükəsizlik gündəmi ilə bağlı görüş keçirib.
Crossmedia.az xarici mediaya istinadən xəbər verir ki, görüşdə Avropanın təhlükəsizliyi və dəyərlərinin qorunması, Ukraynaya sülhün qaytarılması istiqamətində koordinasiyanın gücləndirilməsi, həmçinin ədalətli və davamlı atəşkəsin əldə olunması üçün Avropanın mövqeyinin gücləndirilməsi məsələləri müzakirə edilib.
İspaniyanın xarici işlər naziri Xose Manuel Albares Ukrayna ilə bağlı qərarlarda Avropanın səsinin hər zaman eşidildiyini vurğulayaraq, "Ukraynanın tam suverenliyini təmin etməyən heç bir planı qəbul etməyəcəyik", – deyə bildirib.
Onun sözləinə görə, Ukraynaya sülh gec-tez gəlməlidir. Avropa İttifaqı olaraq müharibə başlayandan bəri Ukraynaya bütün imkanlarla dəstək göstərilir.
Qeyd edək ki, Madriddə keçirilən görüşdə Avropa İttifaqının xarici işlər və təhlükəsizlik siyasəti üzrə ali nümayəndəsi Kaja Kallas və Aİ-nin müdafiə və kosmos üzrə komissarı Andrius Kubilius da iştirak ediblər.
Aybəniz Səfərova
19:19 31.03.2025
Oxunuş sayı: 6669
