Peskov: "Rusiya və ABŞ arasında ikitərəfli münasibətlər yenidən qurulacaq"
Kremlin sözçüsü Dmitri Peskov Rusiya və ABŞ arasında ikitərəfli münasibətlərin yenidən qurulması istiqamətində işlərin davam etdiyini bildirib.
Crossmedia.az xarici mətbuata istinadən xəbər verir ki, o, Moskva və Vaşinqtonun Ukrayna probleminin həlli üçün bəzi ideyalar üzərində çalışdığını qeyd edib.
ABŞ prezidenti Donald Trampın Ukrayna ilə bağlı bəyanatlarına və Rusiya prezidenti Vladimir Putinə qəzəbləndiyi barədə yayılan məlumatlara toxunan Kremlin sözçüsü bildirib:
"Amerika ilə münasibətlərin yenidən qurulması üçün işləməyə davam edirik. Əvvəlki ABŞ administrasiyası əlaqələrimizə böyük zərbə vurdu. Ukrayna probleminin həlli ilə bağlı da bəzi ideyalar üzərində işləyirik, lakin hələlik ciddi irəliləyiş yoxdur".
Peskov ABŞ və Rusiya arasında nadir torpaq elementləri ilə bağlı hər hansı sənədin imzalanmadığını vurğulayıb. Onun sözlərinə görə, bəzi ABŞ şirkətləri bu məsələyə maraq göstərsə də, hələlik konkret addımlar atılmayıb:
"Bu sahəyə maraq var, çünki burada qarşılıqlı fayda verən birgə layihələrdən söhbət gedir. Rusiya və ABŞ şirkətlərinin bu cür layihələrə marağı ikitərəfli münasibətlərin yaxşılaşdırılmasının ilk mərhələsidir", - deyə Peskov əlavə edib.
Putin və Tramp arasında yeni bir telefon danışığının planlaşdırılıb-planlaşdırılmadığına gəlincə, Peskov belə bir görüşün hazırda gündəmdə olmadığını bildirib:
"Putin Trampla təmaslara açıqdır. Lazım gəldikdə belə bir görüş qısa müddətdə təşkil edilə bilər".
Aybəniz Səfərova
17:26 31.03.2025
Oxunuş sayı: 6979
