Myanmada milli matəm elan edildi
Myanma hökuməti martın 28-də baş verən dağıdıcı zəlzələnin fəsadlarına görə ölkədə milli matəm elan edib.
Crossmedia.az xəbər verir ki, rəsmi açıqlamaya görə, 31 mart - 6 aprel tarixləri arasında milli matəm günləri kimi qeyd ediləcək və zəlzələdə həyatını itirənlərin xatirəsinə ölkə daxilində bayraqlar yarıya qədər endiriləcək.
Rəsmi məlumatlara əsasən, 7,9 bal gücündəki zəlzələ nəticəsində Myanmada indiyədək 1700 nəfərin həyatını itirdiyi təsdiqlənib.
Bundan əlavə, 3400 nəfərin yaralandığı, təxminən 300 nəfərin isə hələ də itkin düşdüyü bildirilir. Dağıntılar ölkənin müxtəlif bölgələrində geniş miqyas alıb, xilasetmə işləri isə davam edir.
Zəlzələdən sonra Myanmaya beynəlxalq yardımlar göndərilməyə başlanıb. Axtarış-xilasetmə qrupları bölgədə fəaliyyətini davam etdirir. Rəsmi qurumlar bildirir ki, resursların məhdudluğu və infrastrukturun ciddi zədələnməsi səbəbindən xilasetmə işləri çətinliklə aparılır.
Myanma hökuməti dünya ictimaiyyətinə müraciət edərək, humanitar yardımların artırılmasını və beynəlxalq təşkilatların dəstəyini gücləndirməsini istəyib.
16:47 31.03.2025
Oxunuş sayı: 12470
