Xarici xəbərlər
Ştaynmayer separatçıların bayrağını paylaşdı, sonra sildi
Almaniya yenidən Azərbaycana qarşı qərəzli mövqeyini nümayiş etdirib. Almaniya Prezidenti Frank-Valter Ştaynmayer Ermənistanda səfərdə olarkən "Instagram" hesabında Qarabağdakı separatçıların bayrağını paylaşaraq bu mövcud olmayan bölgəni “Dağlıq Qarabağ” adlandırıb. Bu addım Azərbaycanın ərazi bütövlüyünə birbaşa hörmətsizlik kimi qiymətləndirilir.
Crossmedia.az xəbər verir ki, bu son vaxtlarda baş verən ikinci anti-Azərbaycan təxribatıdır. Daha öncə Almaniyanın dövlət mediası olan "Deutsche Welle" birtərəfli yanaşma sərgiləyərək Qarabağ münaqişəsinə dair təhrif olunmuş sənədli film yayımlamışdı.
Qeyd edək ki, Azərbaycanın işğaldan azad etdiyi ərazilərdə inzibati bölgü dəyişdirilib və artıq “Dağlıq Qarabağ” adlı bölgə mövcud deyil. Hazırda ölkədə Qarabağ və Şərqi Zəngəzur iqtisadi rayonları var.
Ştaynmayerin bu paylaşımı diplomatik prinsipləri pozmaqla yanaşı, Almaniyanın birtərəfli mövqeyini açıq şəkildə nümayiş etdirir. Onun Ermənistandakı səfərindən sonra Azərbaycana da gələcəyi gözlənilir və rəsmi Bakı bu təxribatla bağlı izahat tələb etməyə tam haqqı var.
Bununla belə, Almaniya Prezidenti Azərbaycana səfəri ərəfəsində geri addım ataraq paylaşımına görə tənqidlərə tab gətirməyib və separatçıların bayrağını əks etdirən fotonu "Instagram" hesabından silib. Bu addım, Ştaynmayerin yanlış mövqeyinin nəticəsi olaraq qiymətləndirilir. Lakin postun silinməsi, Azərbaycanın ərazi bütövlüyünə qarşı edilən hörmətsizliyi dəyişdirmir.
Xumar Emilqızı
16:26 31.03.2025
Oxunuş sayı: 14582
