İran XİN Trampın təhdidlərinə CAVAB VERDİ
ABŞ prezidenti Donald Trampın İranı bombalamaqla bağlı təhdidlərinə İran Xarici İşlər Nazirliyindən rəsmi cavab verilib.
Crossmedia.az xarici mətbuata istinadən xəbər verir ki, Nazirliyin sözçüsü İsmayıl Bəqai bu barədə açıqlama verərək, ABŞ-ın atacağı addımlara görə məsuliyyət daşımalı olduğunu vurğulayıb.
İsmayıl Bəqai sosial media hesabında paylaşdığı açıqlamada Trampın İranı bombalamaq təhdidini beynəlxalq sülh və təhlükəsizliyə qarşı "sarsıdıcı təhqir" adlandırıb.
O bildirib ki, "Bir dövlət başçısının İrana qarşı açıq şəkildə bomba təhdidi irəli sürməsi beynəlxalq hüquq normalarına və qlobal stabilliyə ciddi təhlükə yaradır".
Bəqai həmçinin, Trampın bəyanatının Birləşmiş Millətlər Təşkilatının (BMT) Nizamnaməsinə və Beynəlxalq Atom Enerjisi Agentliyinin (MAQATE) təminatlarına zidd olduğunu qeyd edib.
O əlavə edib ki, "Şiddət yalnız şiddət doğurur, sülh isə sülhə gətirib çıxarır. ABŞ bunun nəticələrini və təsirlərini qəbul edərək öz yolunu seçə bilər".
Qeyd edək ki, Trampın açıqlamaları və İranın cavabı beynəlxalq ictimaiyyətin diqqətini çəkib. Bir çox ekspertlər və siyasətçilər bu gərginliyin regional və qlobal sabitliyə mənfi təsir edə biləcəyini bildirirlər. Analitiklər ABŞ və İran arasında diplomatik yolların açıq saxlanmasının vacibliyini vurğulayırlar.
Hazırda beynəlxalq aləm ABŞ və İran arasında yaranan bu gərginliyi diqqətlə izləyir. Gələcək addımların bölgədə sülhə və təhlükəsizliyə necə təsir edəcəyi isə yaxın zamanda daha da aydınlaşacaq.
Aybəniz Səfərova
16:18 31.03.2025
Oxunuş sayı: 852
