Myanmada baş verən zəlzələ Taylandda təşvişə səbəb olub
Cənub-Şərqi Asiyanın Myanma ölkəsində baş verən güclü zəlzələlərdən sonra bölgədə artçı təkanlar davam edir.
Crossmedia.az xarici mediaya istinadən xəbər verir ki, cümə günü Myanmanın müxtəlif bölgələrində 7,7 və 6,4 bal gücündə iki güclü zəlzələ qeydə alınıb. Bu zəlzələlər Tayland və ətraf ölkələrdə də hiss edilib.
Taylandın paytaxtı Banqkokda yeraltı təkanlar böyük narahatlıq yaradıb. Minlərlə insan panikaya düşərək küçələrə axışıb, çoxsaylı binalar təhlükəsizlik məqsədilə təxliyə edilib. Xüsusilə Banqkokun göydələnlər sıx yerləşən mərkəzi hissəsində təxliyə və fövqəladə vəziyyət tədbirləri gücləndirilib.
Taylandın baş naziri Paetongtarn Shinawatra mətbuat konfransında ictimaiyyəti sakitliyə çağırıb. O bildirib ki, zəlzələnin episentri Myanmada olub və Banqkokda yalnız artçı təkanlar hiss edilib.
Baş nazirin sözlərinə görə, dövlət qurumları vəziyyəti yaxından izləyir və Banqkokda ciddi dağıntının qeydə alınmadığını vurğulayıb.
Tayland Meteorologiya İdarəsinin açıqlamasına görə, cümə günündən bəri bölgədə 207 artçı təkan qeydə alınıb.
Son zəlzələ nəticəsində Banqkokda 8 bina təxliyə edilib. Təxliyə olunan binalar arasında hökumət binası, xəstəxana, məhkəmə binası və hərbi məktəb də var.
Hesabata görə, ölkənin 18 əyalətində 591 ev, 66 məbəd, 92 xəstəxana, 9 bina, 58 məktəb və 27 hökumət binası zərər görüb.
Zəlzələlər nəticəsində Taylandda 18 nəfər həyatını itirib, 33 nəfər isə yaralanıb.
Myanmada baş verən dağıdıcı zəlzələlərdən sonra axtarış-xilasetmə işləri davam edir. Hazırkı məlumatlara əsasən, indiyədək 1700-dən çox insanın cəsədi tapılıb.
Beynəlxalq təşkilatlar Myanmaya yardım göndərməkdə davam etsə də, ölkənin xilasetmə resurslarının məhdudluğu səbəbilə ölənlərin sayının 10 mini keçə biləcəyi ehtimal edilir.
Qeyd edək ki, Banqkokda 33 mərtəbəli göydələndə aparılan axtarış-xilasetmə işlərinin üçüncü günü tamam olub. Hazırda 78 nəfər itkin düşmüş hesab edilir və onların sağ qalma ehtimalı getdikcə azalır.
Bölgədə fövqəladə vəziyyət davam edir, həm Myanma, həm də Tayland hökumətləri zəlzələnin fəsadlarını minimuma endirmək üçün səylərini davam etdirir.
16:07 31.03.2025
Oxunuş sayı: 1591
