Qrenlandiyanın yeni Baş Nazirindən Trampa sərt cavab: “Heç kimə aid deyilik!”
Qrenlandiyanın yeni Baş naziri Yens-Frederik Nielsen, ABŞ Prezidenti Donald Trampın adanın nəzarətini ələ keçirmək istədiyinə dair açıqlamalarına sərt reaksiya verib.
Crossmedia.az xarici mediaya istinadən xəbər verir ki, “Prezident Tramp, ABŞ-nin Qrenlandiyanı alacağını deyir. Açıq şəkildə bildirirəm: ABŞ bunu edə bilməyəcək. Heç kimə aid deyilik. Öz gələcəyimizi özümüz müəyyən edirik,” – deyə Nielsen vurğulayıb.
Donald Tramp NBC-yə verdiyi müsahibədə “Qrenlandiyanı alacağıq. Bəli, yüz faiz” deyərək, bunun hərbi güc tətbiq olunmadan da mümkün ola biləcəyini bildirib. O, Qrenlandiyanın muxtar statusuna baxmayaraq, hələ də Danimarka torpağı olduğunu və ABŞ üçün strateji əhəmiyyət daşıdığını qeyd edib.
33 yaşlı Yens-Frederik Nielsen Qrenlandiyanın ən gənc baş naziri kimi cümə günü and içib. O, ilk mətbuat konfransında “Xalq olaraq təzyiq altında olduğumuz bir zamanda birliyimizi qorumalıyıq” deyərək siyasi həmrəylik çağırışı edib.
Bu arada, ABŞ-ın vitse-prezidenti JD Vance başçılıq etdiyi nümayəndə heyəti Qrenlandiyaya səfər edib. Vance Danimarkanı tənqid edərək, “Danimarkaya mesajımız çox sadədir: Qrenlandiya xalqı üçün yaxşı bir iş görməmisiniz. Onların təhlükəsizliyinə kifayət qədər investisiya qoyulmayıb” ifadələrini işlədib.
Danimarkanın Xarici İşlər Naziri Lars Lokke Rasmussen isə ABŞ-nin sərt tənqidlərinə cavab verərək, “Tənqidlərə açığıq, lakin üslub bizi qane etmir. Yaxın müttəfiqlərinizlə belə danışmamalısınız. Mən hələ də Danimarka və ABŞ-ni yaxın müttəfiqlər hesab edirəm” deyib.
Trampın açıqlamaları ilə ABŞ və Qrenlandiya arasındakı gərginlik yeni mərhələyə keçib. Bunun fonunda Qrenlandiyanın müstəqilliyi və gələcəyi ilə bağlı müzakirələr daha da qızışıb.
Mədinə Cəlilova
14:37 31.03.2025
Oxunuş sayı: 1223
