Zelenski: “Putin görünəndən daha zəifdir”
Rusiya ABŞ administrasiyasındakı bəzi şəxslərə təsir etməyə nail olub.
Crossmedia.az xəbər verir ki, bu fikri Ukrayna Prezidenti Volodimir Zelenski “Time” jurnalına verdiyi müsahibədə səsləndirib.
Onun sözlərinə görə, Moskvanın Vaşinqtona verdiyi siqnal ondan ibarət olub ki, guya Ukrayna müharibəni dayandırmaq istəmir və onları buna məcbur etmək lazımdır. Zelenski həmçinin Ukrayna Silahlı Qüvvələrinin Kurşinadan çıxmasını şərh edib və bunun ABŞ-nin hərbi yardımının dayandırılması ilə əlaqəli olmadığını vurğulayıb. O, Rusiya Prezidenti Vladimir Putinin minlərlə ukraynalı hərbçinin bu bölgədə mühasirəyə alındığı barədə dediklərini "yalan" adlandırıb.
Zelenski Trampın Rusiya ilə danışıqlarda müəyyən güzəştlər əldə edə biləcəyini istisna etməyib. O bildirib ki, Putin görünəndən daha zəifdir və ona etibar etmək olmaz.
Bundan əlavə, Ukrayna lideri Rusiyanın G7-yə mümkün qayıdışı məsələsinə də münasibət bildirib: "Bu böyük güzəşt olar. Təsəvvür edin ki, Hitler siyasi təcriddən çıxarılır".
Zelenski qeyd edib ki, Rusiya müharibədə qalib gəlsə, bu, təkcə Ukrayna üçün deyil, bütün Qərb, xüsusilə də ABŞ və onun rəhbərliyi üçün ciddi itki olacaq.
Bundan başqa, prezident ABŞ-nin yeni vitse-prezidenti Cey Di Venslə telefon danışığı zamanı ona müharibə dövründə Ukraynaya səfər etməsi barədə qərarını yenidən nəzərdən keçirməyi təklif etdiyini, lakin cavab almadığını bildirib.
Xumar Emilqızı
21:38 24.03.2025
Oxunuş sayı: 9448
