Trump qorxunu artırır: Yeni nüvə silahlanma dövrü başlayıb?
ABŞ prezidenti Donald Trampın xarici siyasət addımları qlobal narahatlığa səbəb olur. Yeni bir nüvə silahlanma yarışının qapıda olduğu barədə ehtimallar artır. İddialara görə, nüvə silahına sahib olan dövlətlərin sayı 25-ə çata bilər.
Crossmedia.az “Financial Times” qəzetinə istinadən xəbər verir ki, Trampın hakimiyyətə qayıdışı dünyada yeni bir nüvə dövrünün başlamasına səbəb olub. Soyuq Müharibə dövründə ABŞ və SSRİ ən azından nüvə silahlanmasının qlobal təhlükə olduğu mövzusunda razılığa gəlmişdilər. 1960-cı illərdə ABŞ prezidenti Con F. Kennedi bu təhlükənin qarşısını almaq üçün Nüvə Silahlarının Yayılmasının Qarşısının Alınması Anlaşması üçün danışıqlara başlamışdı. 1970-ci ildə qüvvəyə minən bu anlaşma, ABŞ-nin müttəfiqlərinə verdiyi nüvə qoruma qalxanına əsaslanırdı.
Lakin Trampın NATO-ya və Avropaya olan məsafəli münasibəti, Rusiyaya yaxınlığı Berlin, Varşava, Seul və Tokio kimi müttəfiq paytaxtları ciddi suallarla qarşı-qarşıya qoyub: Vaşinqtonun nüvə qoruma qalxanı geri çəkilərsə, nə baş verəcək? Bu ehtimala necə hazırlaşmaq lazımdır?
Hazırda BMT Təhlükəsizlik Şurasının beş daimi üzvü – ABŞ, Rusiya, Çin, Fransa və Böyük Britaniya – rəsmi olaraq nüvə silahına sahibdir. Lakin Şimali Koreya, İsrail, Hindistan və Pakistan da nüvə gücləri sırasında yer alır.
Analitiklərə görə, Trampın xarici siyasəti nəticəsində Avropa və Asiyadakı müttəfiq ölkələr öz nüvə proqramlarını inkişaf etdirməyi düşünürlər. Bu proses nüvə silahına sahib olan dövlətlərin sayını 25-ə qədər artıra bilər.
Nüvə silahlanmasını nəzərdən keçirən ölkələr sırasında Almaniya, Polşa, Cənubi Koreya və Yaponiya var. Almaniya nüvə silahlarını Fransa və Böyük Britaniya ilə paylaşma ideyasını müzakirə edir. Polşa öz ərazisində ABŞ-ın nüvə başlıqlarına ev sahibliyi etmək istəyir. Yaponiya və Cənubi Koreya isə nüvə silahlarını Çin və Şimali Koreyaya qarşı çəkindirici faktor kimi görür.
Bu vəziyyət, dünyada yeni bir nüvə yarışının başlama ehtimalını gücləndirir.
Mədinə Cəlilova
18:47 24.03.2025
Oxunuş sayı: 10541
