İsrailin Türkiyə ilə bağlı narahatlığı: “Qarşıdurma istəmirik”
İsrailin xarici işlər naziri Gideon Saar, Avropa İttifaqının Xarici İşlər və Təhlükəsizlik Siyasəti üzrə Ali Nümayəndəsi Kaja Kallas ilə keçirdiyi mətbuat konfransında İsrailin Türkiyə ilə Suriyada və ya başqa bir yerdə qarşıdurma istəmədiyini bildirib.
Crossmedia.az İsrail mətbuatına istinadən xəbər verir ki, Qərbi Qüdsdə keçirilən birgə mətbuat konfransında Saar, Avropa İttifaqının İsrailin əsas ticarət tərəfdaşı olduğunu vurğulayıb. O, İsrailin İran, husilər, HƏMAS və Hizbullahla mübarizəsinin Qərb sivilizasiyasının maraqlarına xidmət etdiyini iddia edib.
Saar ABŞ-nin keçmiş prezidenti Donald Trampın Yaxın Şərq üzrə xüsusi nümayəndəsi Stiv Vitkoffun Qəzzada atəşkəs təklifinin İsrail tərəfindən qəbul edildiyini, lakin HƏMAS tərəfindən rədd edildiyini bildirib. Onun sözlərinə görə, “Qəzzadakı israilli əsirlərin azad edilməsi, bölgənin silahsızlaşdırılması və HƏMAS ilə İslami Cihadın silahlı qruplarının çıxarılması halında müharibə sabah bitə bilər”.
İsrailin Qəzzaya humanitar yardımların girişini məhdudlaşdırmasına toxunan Saar, HƏMAS-ın bu yardımlardan güc qazandığını iddia edərək, İsrailin beynəlxalq hüquqa uyğun davrandığını bildirib. O, İsrailin yardımların paylanmasını əvvəlki sistem üzrə həyata keçirməyəcəyini və fərqli bir model tətbiq edəcəklərini, lakin bunun detallarını açıqlamayacağını söyləyib.
Türkiyənin Suriyadakı təsiri ilə bağlı suala cavab verən Saar, “Türkiyə ilə Suriyada və ya başqa bir yerdə qarşıdurma istəmirik” deyə bildirib.
İsrailin Qəzzanı tamamilə işğal edib hərbi nəzarətə götürməsi məsələsində ABŞ-la məsləhətləşib-məsləhətləşmədiyi barədə suala cavab olaraq, Saar bu məsələnin hələ hökumət tərəfindən qərara alınmadığını qeyd edib.
Mədinə Cəlilova
18:36 24.03.2025
Oxunuş sayı: 1334
