Fridrix Mertz Almaniyada koalisiya hökuməti qurmaq üçün əsas üstünlüyünü itirdi
Almaniyanın mühafizəkar Xristian Demokrat İttifaqı və Xristian Sosial İttifaqı blokunun lideri və ehtimal olunan gələcək kansler Fridrix Mertz, Sosial Demokratlarla hökumət qurmaq üçün apardığı danışıqlarda əsas üstünlüyünü itirib.
Crossmedia.az xəbər verir ki, Politico nəşrinin məlumatına görə, Mertz milli borcun artırılması məsələsində güzəştə getməyə razılaşıb.
Bu addım miqrasiya və sosial xərclərlə bağlı yeni kompromislərin mümkünlüyünü gündəmə gətirir. Bunun isə sağçı elektoratı məyus edəcəyi və Xristian Demokrat İttifaqı ilə Xristian Sosial İttifaqı blokunun gələcəyi ilə bağlı suallar yaradacağı ehtimal edilir.
Xatırladaq ki, martın əvvəlində Xristian Demokrat İttifaqı və Xristian Sosial İttifaqı blokları fevralın 23-də keçirilən parlament seçkilərində ən çox səs topladıqdan sonra Alman Sosial Demokrat Partiyası ilə koalisiya hökuməti qurmaq üçün danışıqlara başlayıb. Xristian Demokrat İttifaqı, Xristian Sosial İttifaqı, sağçı Almaniya üçün Alternativ partiyası ilə əməkdaşlıq etməyəcəyini açıqladığı üçün Alman Sosial Demokrat Partiyası hazırda onların yeganə potensial tərəfdaşı hesab olunur.
Xumar Emilqızı
15:57 24.03.2025
Oxunuş sayı: 1150
