Sağlamlıq imkanları məhdud 50-dək uşaq oftalmoloji müayinədən keçib
Səhiyyə Nazirliyi və Akademik Zərifə Əliyeva adına Milli Oftalmologiya Mərkəzinin birgə təşəbbüsü ilə 1 saylı Sağlamlıq İmkanları Məhdud Uşaqlar üçün Sosial Xidmət Müəssisəsində mərkəzin Avtomobil Səyyar Klinikasının tibbi aksiyası həyata keçirilib.
Crossmedia.az Milli Oftalmologiya Mərkəzinə istinadən məlumat verir ki, aksiya çərçivəsində 50-dək uşaq oftalmoloji müayinədən keçib. Aparılan müayinələr zamanı miopik astiqmatizm, allergik konyunktivit və digər göz xəstəlikləri aşkarlanıb.
Müayinə zamanı ehtiyacı olan uşaqlara təmənnasız dərman vasitələri təqdim edilib ki, bu da onların sağlamlığının qorunması üçün mühüm dəstəkdir.
Tədbir çərçivəsində Novruz bayramı münasibətilə uşaqlar üçün xüsusi şənlik, bayram süfrəsi təşkil edilib, sovqatlar təqdim edilib. Keçəl və Kosa personajlarının iştirakı ilə keçirilən tədbir uşaqlara sevinc bəxş edib və bayramın ənənəvi ruhunu yaşadıb. Rəngarəng dekorasiyalar, bayram mahnıları və əyləncəli oyunlarla müşayiət olunan bu şənlik uşaqlar üçün unudulmaz anlar yaradıb. Onlar Novruzun əsas atributları olan səməni, boyanmış yumurtalar və şirniyyatlarla bəzədilmiş süfrə ətrafında toplaşaraq bayramın ruhunu hiss ediblər.
Bu cür sosial tədbirlər, xüsusilə sağlamlıq imkanları məhdud uşaqların cəmiyyətə inteqrasiyasını asanlaşdırır, sosial bacarıqlarını inkişaf etdirir və bayram sevincini hiss etmələrinə şərait yaradır. Eyni zamanda, onlar diqqət və qayğını görürlər ki, bu da onların özlərini dəyərli və əhəmiyyətli hiss etmələrinə kömək edir. Belə tədbirlər onlarda özlərinə inam hissini gücləndirir və xoş xatirələr bəxş edir. Bayramın kollektiv şəkildə qeyd edilməsi onların bir-biri ilə daha yaxından tanış olmasına, dostluq münasibətləri qurmasına və sosial adaptasiyasına töhfə verir.
1 saylı Sağlamlıq İmkanları Məhdud Uşaqlar üçün Sosial Xidmət Müəssisəsinin direktoru Sevinc Məlikova göstərilən dəstəyə görə Akademik Zərifə Əliyeva adına Milli Oftalmologiya Mərkəzinin direktoru professor Elmar Qasımova və kollektivinə təşəkkürünü bildirərək gələcəkdə də bu cür aksiyaların davam etdirilməsinin vacibliyini vurğulayıb.
Müayinələr Akademik Zərifə Əliyeva adına Milli Oftalmologiya Mərkəzinin həkimləri Leyla Əliyeva və Aynur Ağayeva tərəfindən həyata keçirilib.
Həmçinin qeyd edək ki, akademik Zərifə Əliyeva adına Milli Oftalmologiya Mərkəzinin Səyyar Klinikası təkcə paytaxt deyil, regionlarda, eləcə də işğaldan azad edilmiş torpaqlarımızda tibbi aksiyalarını davam etdirir. Həmin aksiyalar çərçivəsində ehtiyacı olan insanlara pulsuz müalicə, eynək və dərman vasitələri təqdim edilir. Məqsəd, regionda yüksəksəviyyəli tibbi xidmətin əlçatanlığını təmin etmək və insanların göz sağlamlığını qorumağa dəstək olmaqdır.
20:05 20.03.2025
Oxunuş sayı: 14398
