BSU-da “Yeni dövrün Azərbaycanı: Qərbi Azərbaycan irsi və milli-mədəni dəyərlər” mövzusunda tədbir keçirilib
Bakı Slavyan Universitetində (BSU) “Yeni dövrün Azərbaycanı: Qərbi Azərbaycan irsi və milli-mədəni dəyərlər” mövzusunda tədbir keçirilib.
Crossmedia.az BSU-ya istinadən bildirir ki, əvvəlcə tədbir iştirakçıları universitetin foyesində fakültələr tərəfindən hazırlanmış və Novruzun adət-ənənələrini əks etdirən guşələrlə tanış olublar.
Tədbir Azərbaycan Respublikasının Dövlət Himninin səsləndirilməsi ilə başlayıb.
Açılış nitqi ilə çıxış edən BSU-nun rektoru Anar Nağıyev ötən il sentyabrın 24-də universitetdə Qərbi Azərbaycan Elmi-Tədqiqat Mərkəzinin yaradıldığını və bu il rəsmi açılışının baş tutduğunu bildirib. O qeyd edib ki, Mərkəzin fəaliyyət göstərməsi ölkə Prezidentinin qarşıya qoyduğu Qərbi Azərbaycana Qayıdış Konsepsiyası çərçivəsində ali təhsil müəssisəsinin üzərinə düşən missiyanı yerinə yetirməkdən ibarətdir.
Rektor deyib: “Biz Novruz tonqallarının bütün Azərbaycan ərazisində alovlanmasının şahidi olmasından qürur duyuruq. Prezident İlham Əliyevin Şuşada, Xankəndidə, Ağdamda, Xocalıda və digər bölgələrdə Novruz tonqalı yandırması hər birimizin qürur mənbəyidir. Biz çox xoşbəxtik ki, dövlətimizin başçısının qurduğu yeni dövrün Azərbaycanında yaşayırıq”.
A.Nağıyev əlavə edib ki, Novruz bayramı ənənələrini yaşatmaq və milli-mənəvi irsimizi qorumaq Ulu Öndər Heydər Əliyevin müəllifi olduğu azərbaycançılıq məfkurəsinin ayrılmaz hissəsidir: “Biz Ulu Öndər Heydər Əliyevin yaratdığı müasir Azərbaycan dövlətinin vətəndaşları olaraq, ölkəmizin dinamik inkişafının şahidi olmaqdan və bu prosesin bir parçası kimi iştirak etməkdən böyük xoşbəxtlik hissi keçiririk. Bu gün Novruz bayramı bizə həm də azərbaycanlıların tarixən yaşadığı əzəli torpaqlarına qayıdış çağırışı edir. Biz Qarabağa və Şərqi Zəngəzura qayıtdıq, eləcə də Qərbi Azərbaycan torpaqları bizi milli-mənəvi irsimizi orada yenidən canlandırmağa səsləyir”.
Rektor dövlərimizin başçısının 2022-ci il dekabrın 24-də Qərbi Azərbaycandan olan bir qrup ziyalı ilə görüşündə səsləndirdiyi qayıdış konsepsiyasının qarşıya qoyduğu məsələləri bir daha qeyd edərək, azərbaycanlıların öz torpaqlarına geriyə qayıdış hüququnun olduğunu vurğulayıb.
“Bu günümümzn Novruz tonqalları zəfərimizin, suverenliyimizin, eləcə də bütövlüyümüzün rəmzinə çevrilib”, - deyə BSU rəhbəri fikrini yekunlaşdırıb.
Tədbirdə çıxış edən AMEA-nın akademiki, Qərbi Azərbaycan İcmasının üzvü Abel Məhərrəmov Qərbi Azərbaycanın tarixi, onun Azərbaycan xalqının etnik-mədəni irsində oynadığı mühüm rol və Azərbaycan dövlətinin qədim tarixindən söz açdı. O, Qərbi Azərbaycan ərazisinin tarixən Azərbaycan xalqının ayrılmaz bir parçası olduğunu vurğulayaraq, bu istiqamətdə aparılan elmi araşdırmaların əhəmiyyətini qeyd edib.
Azərbaycan Dövlət Pedaqoji Universitetinin (ADPU) beynəlxalq əlaqələr üzrə prorektoru, Qərbi Azərbaycan İcmasının üzvü professor Mahirə Nağıqızı Novruz bayramının milli-mənəvi dəyərlər sistemindəki əhəmiyyətindən bəhs edərək, onun xalqımızın tarixi yaddaşındakı yerindən söz açıb. Professor, eyni zamanda Prezident İlham Əliyevin Qərbi Azərbaycana dair apardığı siyasətin tarixi ədalətin bərpasına yönəldiyini vurğulayıb və dövlətimizin başçısının Qərbi Azərbaycandan olan bir qrup ziyalılarla görüşü zamanı söylədiyi fikirlərə istinad edərək, Qərbi Azərbaycana qayıdışın sülh, elm və əmin-amanlıq yolları ilə həyata keçiriləcəyinə inamını ifadə edib.
ADU-nun Azərbaycan ədəbiyyatı kafedrasının müdiri akademik Muxtar İmanov çıxışında Novruz bayramının tarixi köklərinə nəzər salaraq, onun milli-mənəvi dəyərlər sistemindəki rolunu şərh edib. O, müstəqilliyimizin bərpasından sonra Ulu Öndər Heydər Əliyevin bu milli bayramın daha geniş miqyasda qeyd olunması üçün gördüyü işlərdən danışıb, Novruzun xalqımızın təbiətə, insana və humanizm prinsiplərinə bağlılığının rəmzi olduğunu vurğulayıb.
Azərbaycan Milli Elmlər Akademiyasının Folklor üzrə Elmi Şurasının sədr müavini Mahmud Allahmanlı Novruz bayramı münasibətilə iştirakçıları təbrik edərək, bu bayramın Azərbaycan xalqının birlik və həmrəylik rəmzi olduğunu, onun folklor və mədəniyyətimizdə dərin iz buraxdığını qeyd edib.
Tədbir bayram konserti ilə yekunlaşıb.
11:55 19.03.2025
Oxunuş sayı: 859
