Ermənistandan ideoloji təxribat: "Türkiyə cavab verməlidir"
Ermənistanın İctimaiyyətlə Əlaqələr və İnformasiya Mərkəzinin direktoru Qor Çarukyan deyib ki, Türkiyəli jurnalistlər İrəvan tərəfinin təşəbbüsü ilə Baş nazir Nikol Paşinyandan müsahibə almaq üçün Ermənistana gəliblər.
Onun sözlərinə görə, Ermənistana 10 KİV nümayəndəsi gəlib:
“Bizim təşəbbüsümüzdə 10 media orqanı var idi, məqsəd Ermənistanın bölgədə sabit sülhün bərqərar olması və Ankara-İrəvan münasibətlərinin normallaşdırılması istiqamətindəki yanaşmalarını mümkün qədər birbaşa və ətraflı şəkildə geniş türk ictimaiyyətinə çatdırmaqdır. Səfər zamanı KİV nümayəndələri baş nazir, bir sıra digər rəsmi şəxslərlə müsahibələr və müzakirələr aparıblar”.
Çarukyan bildirib ki, dəvət olunanlar arasında hökumətyönlü, müstəqil və müxalif media nümayəndələri də var:
“Türkiyə mediasının nümayəndələri Ermənistan dövlət büdcəsindən ayrılan vəsaitlə bura gəliblər, üç gün burada qalacaqlar, sabah qayıdacaqlar”.
Məlum olduğu kimi, Ermənistan Baş naziri Nikol Paşinyan Türkiyənin media nümayəndələrinə müsahibə verib. Erməni baş nazir səhifəsində bununla bağlı qısa video da paylaşıb.
Q.Çarukyanın açıqlaması barədə Crossmedia.az-a danışan siyasi şərhçi Aydın Quliyev deyib ki, Türkiyənin rəsmi orqanları heç şübhəsiz ki, bu məsələyə reaksiya verməlidir: " Çünki burada söhbət Ermənistan hakimiyyətinin qardaş Azərbaycanla Türkiyənin isti münasibətlərinə təxribatçı müdaxilə cəhdindən gedir. Çarukyan deyib ki, son günlər Türkiyə mediası belə bir "açar xəbərə geniş yer verib ki, Ermənistanla Türkiyənin münasibətlərinin normallaşmasına mane olan əsas qüvvə Azərbaycandır. Çarukyan bu təxribatçı ideyanı o kontekstdə yayıb ki, bir neçə gün əvvəl Türkiyənin 10 nəfərə yaxın dövlət və xüsusi media orqanının jurnalistləri Ermənistan hökumətinin dəvəti ilə Yerevanda olublar və hətta Türkiyə - Ermənistan sərhəddindəki Marqara gömrük - sərhəd keçid məntəqəsində olublar. Təbii ki, jurnalistlər qayıtdıqdan sonra Çarukyanın təbirincə desək, çoxlu sayda məqalə və reportaj hazırlayıblar və guya onların çoxu bu fikrin üstündə dayanıblar ki, Ermənistanla Türkiyənin münasibətlərinin normallaşmasına imkan verməyən Azərbaycandır.Təbii ki, Ermənistan hakimiyyəti türk jurnalistlərini Yerevana məhz o məqsədlə apardı ki, onların yazılarından, sözlərindən bu cür istifadə etsinlər.
Ancaq indi Türkiyə rəsmilərinin bu təxribata rəy bildirməsi vacibdir".
A.Quliyev bildirib ki, Ermənistan məsələni elə qələmə verir ki, guya bütün Türkiyə cəmiyyətinin əksəriyyəti bu qənaətdədir: "Halbuki bir jurnalistin səriştəsiz fikri heç də bütün xalqın mövqeyi ola bilməz. Belə çıxır ki, guya Türkiyə hakimiyyəti Azərbaycanın maraqlarını nəzərə almadan Ermənistanla münasibətləri qurmaq istəyir, sadəcə Azərbaycan buna mane olur. Elə rəy yaradılır ki, guya Azərbaycanın Türkiyə - Ermənistan normallaşmasına mane olması tam bir neçə gün Türkiyə mediasının "açar xəbəri" statusunda olub. Guya Türkiyə cəmiyyətinin başqa dərdi - səri yox imiş.
Qardaş Türkiyənin Ermənistanla normallaşma prosesində əsil mövqeyini kölgədə buraxmaq istəyirlər. Türkiyənin rəsmi mövqeyi budur ki, Azərbaycanla saziş imzalamadan Ermənistan - Türkiyə normallaşması mümkün deyil. Erməni təxtibatının bir hədəfi də budur ki, həmin təxribatçı fikirlə Türkiyə ictimaiyyətində " Türkiyəni Azərbaycan hakimiyyəti idarə edir" kimi yanlış rəy yaratsınlar və bu iki ölkənin saf qardaşlığına şübhələr oyatsınlar. Qardaş Türkiyənin Ermənistanın ideoloji təxribatına cavabını gözləyirik".
Nuray Mikayıllı
14:52 18.03.2025
Oxunuş sayı: 1203
