Ermənistanla Azərbaycan arasında yeni müharibə olacaq? - AÇIQLAMA
Azərbaycan və Ermənistan arasındakı münasibətlər tarixən gərgin olub və bu qarşıdurma 2020-ci ildə baş verən İkinci Qarabağ müharibəsi ilə yeni mərhələyə keçib. Azərbaycanın ərazi bütövlüyünü bərpa etməsi regional geosiyasi vəziyyəti dəyişsə də, iki ölkə arasında sülhün tam bərqərar olması hələ də aktual məsələ olaraq qalır.
Son dövrlərdə tərəflər arasında atəşkəs pozuntularının artması, Ermənistanın silahlanma siyasəti və xarici dövlətlərin, xüsusilə də Fransa və ABŞ-nin prosesə müdaxiləsi münasibətlərin normallaşmasını çətinləşdirən amillər sırasındadır.
Ermənistan son dövrlərdə silahlanmanı sürətləndirir və Fransadan, ABŞ-dən hərbi texnika alır. Bu, regionda yeni gərginlik yaradır və sülh prosesinə mane olur. Azərbaycan isə sülh müqaviləsinin imzalanmasını istəyir, lakin Ermənistan silahlanma ilə vaxt qazanmağa çalışır. Bu siyasət bölgədə yeni müharibə riskini artırır.
Bu barədə Crossmedia.az-a açıqlamasında hərbi ekspert Elxan Şıxəliyev bildirib ki,atəşkəsin pozulması artıq 3 dəfəyə qalxıbsa bu, Ermənistan tərəfinin sülhə və barışığa meyilli olmadığının sübutudur: “Sürətli silahlanmaya gəldikdə, Ermənistan 2020-ci ilin 8 noyabrından bu günə qədər vaxt qazanmış oldu və Silahlı Qüvvələri Fransadan silah alaraq güclənməyə çalışır. Ermənistan münaqişə istəməsə belə, onu buna təhrik edən qüvvələr var. Onlardan biri də məhz Fransadır. Ermənistana dəstək verən ABŞ və Fransa düşünür ki, Ermənistan olmadan onlar öz maliyyə və geosiyasi maraqlarını təmin edə bilməyəcəklər. Eyni zamanda Ermənistan da buna meyillidir və onları Azərbaycana qarşı güc nümayiş etdirə biləcək qüvvə kimi görür”.
Həmçimin ekspert bildirib ki, Avropa İttifaqı NATO-nun bir üzvüdür və sərhədlərimizə yerləşərək kəşfiyyat məlumatlarını əldə edib Ermənistana ötürür. Digər tərəfdən, Rusiya da bu məsələnin içindədir və faktiki olaraq Ermənistanın tərəfindədir. Həmçinin Ermənistan Silahlı Qüvvələrinə tabe olmayan bəzi qruplaşmalar, o cümlədən VOMA təşkilatı kimi silahlı terrorçu qruplar da mövcuddur.
Ekspertin sözlərinə görə, Ermənistan hər vəchlə iddia edir ki, atəşkəsi pozmur: “Amma düşünürəm ki, Ermənistan vaxt qazanır və sülh sazişi tam imzalanmadan maksimal silahlanmaya çalışır. Ermənistan üçün ən yaxşı variant isə, sülh sazişini tez bir zamanda imzalamaq ola bilər lakin o, bununla razılaşmaq istəmir və ən çətin yolu seçir.
Müharibənin olub-olmayacağı barəsində düşünsək, məsələyə yalnız Ermənistanın istəyi üzərindən baxmayaq, eyni zamanda Ermənistanın son qərarı verməyi vəkalət etdiyi Fransanın mövqeyinə nəzər salaq .Ermənistan Fransanın qanadı altında olan bir ölkə kimi Zəngəzur dəhlizinin açılmamasını təmin etmək üçün müəyyən planlara malikdir və görünən odur ki, Ermənistan özünü idarə edə bilmir və bu səbəbdən digər dövlətlər tərəfindən yönləndirilir”.
Fidan Xəlilova
19:12 17.03.2025
Oxunuş sayı: 1793
