Ciddi şübhələr var: "Ermənistan sülhdə səmimi deyil"
Martın 16-sı saat 09:45 radələrində Ermənistan silahlı qüvvələrinin bölmələri Gorus rayonunun Dığ yaşayış məntəqəsi istiqamətində yerləşən mövqelərindən Ordumuzun mövqelərini atıcı silahlardan atəşə tutub. Bu hadisənin Azərbaycan və Ermənistan arasında sülh və dövlətlərarsı münasibətlərin qurulması haqqında Saziş layihəsinin mətni üzərində danışıqların yekunlaşmasından sonra baş verməsi diqqət çəkir. Görünən odur ki, ya İrəvan səmimi deyil, ya da onun havadarları bölgədə "suların durulmasını" istəmirlər.
Bu barədə Crossmedia.az-a açıqlama verən Milli Məclisin deputatı, Ana Vətən Partiyasının sədr müavini Günay Ağamalı deyib ki,
Azərbaycan və Ermənistan arasında sülh və dövlətlərarsı münasibətlərin qurulması haqqında Saziş layihəsinin mətni üzərində danışıqların yekunlaşması əhəmiyyətli hadisədir, lakin proseslərin tamamilə yekunlaşması məsələsini özündə ehtiva etmir.
O bildirib ki, bu zamana qədər rəsmi İrəvanın həlledici məqamlarda geri çəkildiyi və fərqli kontekstə yönəlməsi praktikası mövcuddur: "Rəsmi Bakı onların uzlaşmaz siyasi ritorikasını istər keçmiş prezidentlər Robert Koçəryan, Serj Sarkisyan hakimiyyəti dövründə, istərsə də hazırkı baş nazir Nikol Paşinyan zamanında dəfələrlə müşahidə edib. Ona görə də Ermənistan konstitusiyasında və digər normativ hüquqi aktlarda öz əksini tapan ərazi iddiaları çıxarılmadığı müddətcə tərəflər arasında imzalanacaq sülh müqaviləsinin hüquqi bazası yoxdur. İstənilən vaxt Ermənistan rəhbərliyi ölkə konstitusiyasına əsaslanaraq sənəddən imtina edə bilər.
Bununla yanaşı cənab Prezident İlham Əliyevin XII Qlobal Bakı Forumunda çıxışı zamanı Ermənistanın sürətlə silahlanması məsələsinə toxunması Paşinyan administrasiyasının etibarsızlığının təzahürüdür. Həqiqətən də, sülh danışıqlarının aktual olduğu müddətdə Ermənistan xarici işlər naziri Ararat Mirzoyanın Hindistana səfər etməsi və iki ölkənin hərbi texniki əməkdaşlıqlarını, silah alınmasını müzakirə etməsi İrəvanın səmimiyyətinə şübhələri daha da artırır".
Kənan Novruzov
16:34 16.03.2025
Oxunuş sayı: 1275
