Zelenski: "Putinə kömək edən qüvvələr məhv edilməlidir"
Ukrayna prezidenti Volodimir Zelenski Rusiyanın Donetsk vilayətinin Dobropillya şəhərinə ballistik raket hücumu ilə bağlı paylaşım edib.
Crossmedia.az xəbər verir ki, o, hücum nəticəsində 20 nəfərin həlak olduğunu, 30-dan çox insanın yaralandığını bildirib.
Zelenskinin sözlərinə görə, Rusiya ordusu hadisə yerinə gələn xilasedicilərə qəsdən ikinci dəfə hücum edib. O, bu hücumu "qeyri-insani hərəkət" adlandırıb.
Hücum nəticəsində səkkiz beşmərtəbəli yaşayış binası, bir inzibati bina və yanğınsöndürmə maşınına ziyan dəyib.
Ukrayna prezidenti, fövqəladə hallar xidmətləri, polis və tibb işçilərinə təşəkkür edərək, Rusiyaya qarşı sanksiyaların sərtləşdirilməsinin və hava hücumundan müdafiə sistemlərinin gücləndirilməsinin vacibliyini vurğulayıb.
Zelenski, Rusiyanın hədəflərinin dəyişmədiyini qeyd edərək, "Putinə müharibəni maliyyələşdirməyə kömək edən qüvvələr məhv edilməlidir"- ifadəsini işlədib.
Aybəniz Səfərova
19:53 08.03.2025
Oxunuş sayı: 9447
