ABŞ və Avropa arasında parçalanma riski artır
ABŞ Prezidenti Donald Trampın hakimiyyətə qayıdışı Avropa hökumətlərini Transatlantik alyansın gələcəyi ilə bağlı narahat edib. Avropa liderləri qarşıdakı dörd ildə alyansın parçalanmasının qarşısını almaq yollarını axtarır.
Crossmedia.az saytı xarici mediaya istinadən xəbər verir ki, bununla belə, ABŞ-nin vitse-prezidenti Cey Di Vensin mövqeyi bu narahatlıqları daha da gücləndirir. Bloomberg agentliyinin məlumatına görə, Vens Avropa rəsmilərinin gözündə əsas müxalif fiqura çevrilib. Fevral ayında Münhen Təhlükəsizlik Konfransında etdiyi çıxışdan sonra onu “Trampdan daha təhlükəli anti-Avropa siyasətçi” kimi qiymətləndirənlər olub.
Xatırladaq ki, fevralın 14-də Vens Avropa İttifaqını senzura, xüsusilə də sosial şəbəkələrin bloklanması ilə bağlı sərt tənqid etmişdi. O, Avropanın “ABŞ üçün yararsız olduğunu”, öz seçicilərindən qorxduğunu və qarşıdakı illərdə mühüm addımlar ata bilməsi üçün demokratik mandat əldə etməli olduğunu bildirmişdi.
Bu açıqlamalar Vaşinqtonla Avropa arasında gərginliyin artmasına və Transatlantik münasibətlərin gələcəyinin sual altına düşməsinə səbəb olub.
13:48 07.03.2025
Oxunuş sayı: 9042
