Ukrayna böhranında yeni addımlar: Dörd maddəlik plan
Britaniyanın Baş naziri Keyr Starmer 1 martda Londonda keçirilən Ukrayna və Avropa təhlükəsizliyi zirvəsindən sonra dörd maddəlik planı elan edib.
Planın əsas bəndləri:
• Ukraynaya hərbi yardımların davam etdirilməsi,
• Kiyevin sülh danışıqlarında iştirakının təmin edilməsi,
• Avropanın gələcəkdə mümkün Rusiya hücumlarını önləmək üçün tədbirlər görməsi,
• Ukraynanın müdafiəsi üçün “könüllülər koalisiyası” yaradılması.
Britaniya Ukraynanın hava hücumundan müdafiə sistemlərini gücləndirmək üçün 1,6 milyard funt sterlinq (2,01 milyard dollar) maliyyə dəstəyi ayıracaq. Yeni müqavilə çərçivəsində Ukrayna 5000-dən çox hava hücumundan müdafiə raketi alacaq.
Starmer, Avropanın təhlükəsizliyini təmin etmək üçün ABŞ-ın dəstəyinin vacibliyini vurğulayıb. ABŞ Milli Təhlükəsizlik müşaviri Mayk Valtz Avropanın təhlükəsizlik sahəsində daha aktiv rol almasını dəstəklədiklərini bildirib.
Kreml sözçüsü Dmitri Peskov isə bu planın sülhə xidmət etmədiyini iddia edib.
Türkiyə sammitdə iştirak edib
Zirvədə Türkiyə Xarici işlər naziri Hakan Fidan da iştirak edib. Prezident Rəcəb Tayyib Ərdoğan sammitlə bağlı açıqlamasında “Türkiyəsiz Avropa təhlükəsizliyi mümkün deyil” deyib. Ankara, sülh danışıqlarına vasitəçilik etməyə və atəşkəs prosesinə töhfə verməyə hazır olduğunu bəyan edib.
Mədinə Cəlilova
08:47 07.03.2025
Oxunuş sayı: 1263
