"Zəngəzur dəhlizinin açılması türk dünyasının birləşməsi baxımından xüsusi əhəmiyyətlidir"- RƏY
Azərbaycan dövlət başçısı İlham Əliyevin martın 5-də Türkiyəyə səfəri ikitərəfli münasibətlər baxımından xüsusi hadisə kimi qiymətləndilir. Belə ki, liderlər fürsətdən istifadə edib ikitərəfli və regional məsələləri müzakirə etməklə yanaşı, həm də Iğdır-Naxçıvan qaz kəmərinin açılış mərasimində iştirak etdilər. Ərdoğan açılış mərasimində çıxışı zamanı dedi ki, ən çətin günlərində Azərbaycan necə Türkiyənin yanında oldusa, Türkiyə də Azərbaycanın çətin günündə onun yanında olacaq.
Sözügedən səfər və verilən mesajlar barədə Crossmedia.az-a danışan Milli Məclisin deputatı Asim Mollazadə bu layihəni Ümid körpüsü ilə müqayisə edib: "Naxçıvanın ən çətin günlərində məhz bu körpü onun xilasına səbəb olub və Türkiyə bu prosesdə mühüm rol oynayıb. Eyni zamanda, qeyd olunmalıdır ki, sovet kommunistləri Naxçıvanı Azərbaycandan ayırmaq məqsədilə Zəngəzuru Ermənistana veriblər. Bununla da Azərbaycanın həm Türkiyə, həm də Naxçıvanla əlaqələrini kəsmək istəyiblər".
Deputat vurğulayıb ki, bugünkü dövrdə bu problemlərin həlli istiqamətində ciddi addımlar atılmalıdır. "Xüsusilə Zəngəzur dəhlizinin açılması təkcə Azərbaycan, Türkiyə və Naxçıvan üçün deyil, bütövlükdə türk dünyasının birləşməsi baxımından böyük əhəmiyyət kəsb edir".
"Əminəm ki, Azərbaycan və Türkiyə bu istiqamətdə birgə səylərini davam etdirərək, həm Naxçıvanın vəziyyətini yaxşılaşdıracaq, həm də yeni bir inteqrasiya sisteminin formalaşmasına nail olacaqlar. Artıq bu proses başlanıb və Azərbaycan Prezidenti İlham Əliyevin Türkiyə Prezidenti Rəcəb Tayyib Ərdoğanla görüşü zamanı bu məsələlərə xüsusi diqqət yetiriləcəyinə əminəm"-deyə A. Mollazadə qeyd edib.
15:42 06.03.2025
Oxunuş sayı: 25467
