Bu, Naxçıvanda tibbi xidmətə əlçatanlığı daha da yaxşılaşdıracaq
Muxtar respublikada tibbi xidmətin keyfiyyətinin artırılması məqsədilə maddi texniki bazası gücləndirilir
Naxçıvan Muxtar Respublikasının Nazirlər Kabinetindən Crossmedia.az-a verilən xəbərə görə, “Naxçıvan Muxtar Respublikasının sosial-iqtisadi inkişafına dair 2023–2027-ci illər üçün Dövlət Proqramı”nın 2025–2027-ci illər üzrə Təfsilatlı Tədbirlər Planı”nına uyğun olaraq Naxçıvan Muxtar Respublikası Səhiyyə Nazirliyi tərəfindən bir sıra işlər həyata keçirilir.
Belə ki, Naxçıvan Sağlamlıq Mərkəzində tibbi xidmətlərin keyfiyyətini artırmaq məqsədilə bir sıra yeniliklər həyata keçirilib.
Məlumat üçün qeyd edək ki, Mərkəzə kardio-reanimasiya, ümumi reanimasiya və kardiocərrahiyyə üçün müvafiq olaraq 2 ədəd xəstəbaşı monitor, ümumicərrahiyyə üçün 1 ədəd xəstəbaşı monitor və transfer üçün 1 ədəd xəstəbaşı monitor avadanlıqları alınıb. Cərrahi prosedurların keyfiyyətini artırmaq məqsədilə 2 ədəd cərrahi aspirator, 1 ədəd audiometriya cihazı, yenidoğulmuşlarda eşitmə qabiliyyətini müayinə etmək üçün 1 ədəd cihaz və 2 ədəd su distilliyatoru alınmışdır.
Bundan başqa, mərkəzdə müalicə və prosedurların düzgün idarə olunması üçün 5 ədəd avtomatik şırınqa pompası, 3 ədəd avtomatik infuziya pompası, 1 ədəd anesteziya cihazı, 1 ədəd anesteziya monitoru və 1 ədəd suni tənəffüs aparatı təmin edilib. Digər vacib avadanlıqlar arasında 1 ədəd soyuducu, 3 ədəd tibbi dondurucu və qan bankı üçün 1 ədəd tibbi soyuducu da mövcuddur. Xəstələrin temperaturunun qorunması üçün 1 ədəd xəstə isitmə cihazı, 2 ədəd qan və infusiya məhsulları isidicisi, 1 ədəd dondurulmuş qan preparatlarının əridilməsi cihazı alınıb.
Yeni alınan avadanlıqlar arasında 6 ədəd bakterisid şüalandırıcı, 8 ədəd 4 ayaqlı əsa, 4 ədəd kirli-təmiz camaşır arabası və 4 ədəd tibbi tullantıların daşınması üçün araba da mövcuddur. Laringoskop və videolarinqoskop dəstləri, 1 ədəd radiotezlikli venoz ablasiya cihazı, 1 ədəd əməliyyat masası üçün qızdırıcı və 1 ədəd elektron nebulyazer də alınan avadanlıqlar arasında yer alır.
Reanimasiya və cərrahiyyə sahəsində 13 ədəd 4 motorlu reanimasiya çarpayısı, 10 ədəd 5 motorlu reanimasiya çarpayısı və 23 ədəd reanimasiya çarpayıları üçün döşək mövcuddur. Eyni zamanda 28 ədəd 3 motorlu cərrahiyyə çarpayısı və 28 ədəd cərrahiyyə çarpayıları üçün döşək alınaraq mərkəzə gətirilmişdir. Xəstələrin daşınması üçün 2 ədəd xəstə daşıma arabası, 2 ədəd xərək, 4 ədəd əlil arabası, 1 ədəd xəstə yuma arabası, 2 ədəd xəstə önü yemək masası və 1 ədəd xəstə daşıyıcı kran alınıb.
Həmçinin Ailə Sağlamlıq Mərkəzləri, Onkoloji Mərkəz və Hemodializ Mərkəzi üçün də bir sıra avadanlıqlar alınıb.Bu mərkəzlərdə təmir işləri başa çatdıqdan sonra avadanlıqlar mərkəzlərin istifadəsinə veriləcəkdir.
Qeyd edək ki, mərkəzlərdə həyata keçirilən bu islahatlar, tibbi xidmətlərin keyfiyyətini artırmaq və xəstələrə yüksək səviyyədə sağlamlıq xidmətləri təqdim etmək məqsədini daşıyır. Bu yeniliklər, Naxçıvan əhalisinin sağlamlığına öz töhfəsini verməklə yanaşı, tibbi xidmətə əlçatanlığı daha da yaxşılaşdıracaq. Adıçəkilən avadanlıqların alınması, mərkəzin tibbi infrastrukturunun gücləndirilməsinə və müalicə proseslərinin daha effektiv, rahat və təhlükəsiz şəkildə həyata keçirilməsinə imkan yaradacaq.
Bundan başqa, Naxçıvan Sağlamlıq Mərkəzində əhalinin daha komfortlu və effektiv müalicə alması üçün genişmiqyaslı infrastruktur yenilənməsi aparılıb, maddi texniki bazası gücləndirilib. Belə ki, mərkəzdə müasir tələblərə uyğun laboratoriya qurulub və bu laboratoriya üçün müvafiq avadanlıqlar alınıb. Qısa müddət ərzində bu avadanlıqların istifadəyə verilməsi nəzərdə tutulur. Həmçinin, mərkəzdə onkoloji xəstələr üçün kimyaterapiya prosedurlarının təhlükəsiz və rahat şəkildə həyata keçirilməsi məqsədilə xüsusi bir bölmə ayrılıb. Bu bölmədə müalicə prosesinin daha effektiv şəkildə təşkil olunması üçün hərtərəfli şərait yaradılıb.
Mərkəzdə əlavə olaraq, iki yeni müasir avadanlıqlarla təchiz edilmiş əməliyyat otaqları istifadəyə verilib. Bu otaqlardan biri hibrid əməliyyat otağıdır ki, bu otaqda yüksək dəqiqlikli diaqnostik və cərrahi müdaxilələrin eyni vaxtda aparılması mümkündür.
Eyni zamanda mərkəzdə pasiyentlər üçün yüksək səviyyəli xidmət təklif edən, müasir standartlara cavab verən palatalar hazırlanıb. Bu palatalar rahatlıq və fərdi qayğı prinsiplərinə əsaslanaraq dizayn edilib və artıq iki palata istifadəyə verilib. Digər palataların təmir işləri yekunlaşdıqda, onlar da xidmətə təqdim olunacaq.Həmçinin Naxçıvan Sağlamlıq Mərkəzində yaradılmaqda olan laboratoriyada İcbari Tibbi Sığortanın Xidmətlər Zərfinə daxil olan bütün laborator xidmətlər göstəriləcək.
Məlumat üçün qeyd edək ki, genişmiqyaslı infrastruktur yenilənməsi təkcə Naxçıvan Sağlamlıq Mərkəzini deyil, eyni zamanda Ailə Sağlamlıq Mərkəzini, Onkoloji Mərkəzi və Hemodializ Mərkəzini də əhatə edəcəkdir. Həyata keçirilən bu işlər hər şeydən əvvəl səhiyyə sisteminin müasir tələblər sisteminə uyğun qurulmasına xidmət edir.
11:40 04.03.2025
Oxunuş sayı: 530
