Dərmanların keyfiyyətsizliyinə dair iddialara rəsmi cavab: “Vətəndaşlara xatırladırıq ki...”
Azərbaycanda dərman bazarı ilə bağlı narazılıqlar hələ də tam səngimir. Vətəndaşlar bu dəfə də dərmanların qiyməti ilə tərkibinin adekvat olmamasından gileylənirlər. Son günlər xüsusilə sosial şəbəkələrdə bu mövzuda paylaşımlara rast gəlinir.
Crossmedia.az vətəndaşların
narahatlığını nəzərə alaraq Səhiyyə Nazirliyinin tərkibində fəaliyyət göstərən
Analitik Ekspertiza Mərkəzinə sorğu göndərdi. Sorğumuza cavab olaraq qurumdan
bildirilib ki, dərman vasitəsinə qeydiyyat vəsiqəsi verildikdən sonra Azərbaycana
idxal edilir: “Qeydiyyat vəsiqəsi verilməzdən öncə dərman vasitəsinin keyfiyyəti
laborator şəraitdə yoxlanılır. Dərman vasitəsinin keyfiyyət parametrlərinin
yoxlanması istehsalçının təqdim etdiyi sənədlərə əsasən həyata keçirilir.
Laboratoriyada dərman vasitələrinin həm fiziki-kimyəvi, həm də mikrobioloji
keyfiyyət göstəriciləri tədqiq edilir. Qeydiyyat vəsiqəsi verildikdən sonra dərman
vasitəsi ölkəyə idxal edilə bilər”.
Bildirilib ki, əczaçılıq müəssisələrində
yoxlamalar keçirilən zaman dövlət qeydiyyatı tələb olunan, lakin dövlət
qeydiyyatından keçməyən, normativ hüquqi aktların, o cümlədən texniki normativ
hüquqi aktların tələblərinə cavab verməyən, keyfiyyətsiz, mənşəyi məlum olmayan,
saxta, yararlılıq müddəti bitən dərman vasitələri aşkar olunduqda dövriyyədən
çıxarılır və aidiyyəti üzrə müvafiq qərar verildiyi təqdirdə qanunvericiliyə
uyğun olaraq məhv edilir: “Vətəndaşlara bir daha xatırladırıq ki, özəl tibb müəssisələrində
və aptek təşkilatlarında üzləşdikləri hər hansı problemlə bağlı AEM-in “bir pəncərə”
sistemi, “qaynar xətt”i (012 596 05 20), [email protected] elektron ünvanı və ya
pharma.az saytının MÜRACİƏT bölməsi vasitəsi ilə bizə müraciət edə bilər. Bu
halda araşdırılma aparılır və lazım gələrsə, plandankənar yoxlama aparılması
barədə qərar qəbul edilir”.
Kənan Novruzov
13:20 20.02.2025
Oxunuş sayı: 14032
