Khan Academy Düşərgəsi layihəsi uğurla başa çatdı
Düyərli kənd 1 saylı tam orta məktəbində Elm və Təhsil Nazirliyinin Təhsildə İnkişaf və İnnovasiya üzrə 8-ci qrant müsabiqəsi çərçivəsində qalib gəlmiş Jalə Namazova tərəfindən həyata keçirilən Khan Academy Düşərgəsi layihəsi uğurla başa çatdı.
Crossmedia.az xəbər verir ki, layihə Düyərli kəndində yaşayan 100 şagirdin riyazi biliklərini artırmaq və onlara müasir onlayn təhsil alətləri ilə tanış olmaq imkanı yaratmaq məqsədi daşıyırdı.
Layihə çərçivəsində şagirdlər Khan Academy platforması vasitəsilə öz profillərini yaratdılar və fərdi qiymətləndirmə testlərindən keçdilər. Gündəlik təlimlərdə iştirak edərək riyazi bacarıqlarını inkişaf etdirdilər. Bununla yanaşı, düşərgə iştirakçıları fərqli komanda oyunlarında və idman dərslərində də iştirak edərək, həm əyləncəli vaxt keçirdilər, həm də fiziki və sosial bacarıqlarını inkişaf etdirdilər. Bu fəaliyyətlər uşaqların həm komanda ruhunu, həm də liderlik və əməkdaşlıq bacarıqlarını gücləndirdi.
Khan Academy Düşərgəsi, xüsusilə kənd yerlərində təhsil imkanlarının bərabərləşdirilməsinə dəstək məqsədi daşıyır. Riyaziyyat biliklərinin artırılması fərdi akademik uğurlar üçün olduğu qədər, gələcək sosial-iqtisadi inkişaf üçün də əhəmiyyətlidir. Layihə şagirdlərin müstəqil öyrənmə bacarıqlarını gücləndirərək, onları STEM (elm, texnologiya, mühəndislik və riyaziyyat) sahələrində daha aktiv olmağa təşviq edir.
Bu təşəbbüs, texnologiyanın və fərqli tədris metodlarının təhsildə tətbiq edilməsinin müasir nümunəsidir. İdman və komanda oyunları ilə təhsilin vəhdəti uşaqların fiziki, zehni və emosional inkişafına müsbət təsir göstərmişdir.
13:19 15.02.2025
Oxunuş sayı: 13192
