Şagird bacarıqlarının inkişaf etdirilməsi mövzusunda elmi seminar
Paytaxtdakı 20 nömrəli məktəb-liseydə elmi seminar keçirilib.
Elm və Təhsil Nazirliyi yanında İctimai Şuranın sədri professor Hikmət Əlizadə və Şuranın katibi Günay Əkbərova tərəfindən keçirilən seminarda təhsil müəssisəsinin rəhbərliyi və pedaqoji kollektivi iştirak edib.
Crossmedia.az Bakı Şəhəri üzrə Təhsil İdarəsindən verilən məlumata istinadən xəbər verir.
Seminarın əsas məqsədi şagirdlərin akademik biliklərini real həyatla əlaqələndirmək, problem həlletmə bacarıqlarını inkişaf etdirmək və onlarda sosial məsuliyyət hissini aşılamaqdan ibarətdir.
Çıxış edənlər şagird bacarıqlarının üzə çıxarılması və inkişaf etdirilməsində müəllim-şagird əməkdaşlığının rolundan danışıb, “Təhsildə yeni yanaşma–Service Learning” metodu barədə iştirakçılara ətraflı məlumat veriblər. Bildiriblər ki, “Service Learning” yanaşması ilə şagirdlər təkcə bilik öyrənmir, həm də cəmiyyətə fayda verən layihələr həyata keçirərək biliklərini praktikada tətbiq edirlər.
Seminarda bu metodların praktikada tətbiqi üsulları müəllimlərə izah edilib, onları maraqlandıran suallara cavab verilib, fikir mübadiləsi aparılıb.
17:41 10.02.2025
Oxunuş sayı: 5044
