Bu müəssisələrdə müəllimlik ixtisası ləğv olunur – HANSI NƏTİCƏ OLACAQ?
Əsrlər boyu nələr dəyişsə də müəllim adının ucalığı və ona cəmiyyət tərəfindən verilən yüksək dəyər dəyişmir. Hazırda respublikamızda bir çox dövlət və özəl təhsil müəsisələri gələcəyin müəllim kadrlarını yetişdirir.
Ötən gün Elm və Təhsil naziri E.Əmrullayev müsahibəsində kolleclərdə müəllimlik ixtisasının tədricən ləğv olunacağını qeyd edib. Bu addım müəllimlik ixtisasında rəqabətliliyi artıracaq. “Kolleclərdə bəzi fənlər üzrə hazırlıq onsuz da aparılmırdı. Məsələn, kimya, fizika, biologiya və riyaziyyat müəllimləri yalnız ali təhsil müəssisələrində hazırlanır. Kolleclərdə daha çox ibtidai sinif, musiqi, təsviri incəsənət və digər fənn müəllimləri hazırlanır”, - deyə nazir qeyd edib.
E. Əmrullayev əlavə edib ki, kolleclərdə ibtidai sinif və məktəbəqədər təhsil üzrə müəllim hazırlığı məhdudlaşdırılacaq: “Burada iki məsələ var, müəllim sayı önəmlidir. Biz nə qədər müəllimi qəbul edirik və nə qədər müəllimə ehtiyac var? Zərurətdən 20-30 faiz çox qəbul planı olur. Çünki bütün müəllimlik ixtisasını biritrənlər müəllim işləmirlər. Hesab edirəm ki, sayları azaltmaqla müəllim ixtisasının daha rəqabətli olacaq.
Mövzuyla bağlı Crossmedia.az-a danışan təhsil eksperti Rəşad Qardaşov məsələyə münasibət bildirib: “Kolleclərdə, orta ixtisas peşə təhsili müəssisələrində hazırlanan kadrlar, mütəxəssislər cəmiyyətin tələb-təklif münasibətləri əsasında formalaşır. İstər kəmiyyət, istərsə də keyfiyyət etibarilə bu proses Elm və Təhsil Nazirliyi tərəfindən tənzimlənir.
İxtisas varsa ona tələbat da var. Bu Nazirlər Kabineti tərəfindən hazırlanmış “Təhsil standartı”nda da öz əksini tapmışdır. Müəllimlik ixtisasının adıçəkilən təhsil müəssisələrində tədricən azaldılması bu peşəyə verilən yüksək dəyər kimi qəbul edilməlidir. Müəllim peşəsinin hər zaman yüksək tutulması və cəmiyyətin intellektual səviyəssinin formalaşmasında bu peşə sahiblərinin müstəsna rolunun olduğunu nəzərə alaraq, bu mütəxəssislərin ali təhsil müəssisələrində daha da böyük kompetensiya və təcrübə ilə hazırlanması məqsədəuyğundur. Qəbul edilən bu qərar gələcəkdə müəllimlik ixtisasında sağlam rəqabətə gətirib çıxaracaq və düşünürəm ki, cəmiyyətimiz bundan çox faydalanacaq”.
Sevinc Bağırlı
17:40 07.02.2025
Oxunuş sayı: 16522
