Təhsilin bu pilləsində köklü islahatlara ehtiyac var – NAZİRDƏN MARAQLI AÇIQLAMA
"Doktorantura və magistratura təhsilində köklü islahatlara ehtiyac var".
Crossmedia.az xəbər verir ki, bunu Elm və təhsil naziri Emin Əmrullayev jurnalistlərin suallarını cavablandırarkən deyib.
O bildirib ki, hazırda Azərbaycanda doktorantura sistemi ikipilləlidir. Lakin bir çox ölkələrdə yalnız fəlsəfə doktoru (PhD) dərəcəsi mövcuddur və elmlər doktoru səviyyəsi yoxdur.
Nazirin sözlərinə görə, bu məsələnin həlli qanunvericilik predmetidir və müvafiq dəyişikliklər ediləcəyi təqdirdə, Elm və Təhsil Nazirliyi onları icra edəcək. O vurğulayıb ki, doktorantura təhsilində köklü islahatlar aparılmalıdır: "Elm və Təhsil Nazirliyi olaraq biz Azərbaycan təhsilinin və elminin müasir dövrə uyğunlaşdırılmasının tərəfdarıyıq. Doktoranturada yalnız dissertasiya yazmaq məcburiyyəti olmamalıdır. Kredit sisteminə keçid və doktorantların tədris prosesinin gücləndirilməsi vacibdir. Lakin bu, uzunmüddətli bir prosesdir".
Magistratura ilə bağlı danışan Emin Əmrullayev əsas dəyişikliklərin tədris prosesində baş verdiyini qeyd edib. O, ixtisas təsnifatında müəyyən yeniliklərin artıq həyata keçirildiyini, lakin növbəti mərhələlərdə daha əhatəli dəyişikliklərə ehtiyac olduğunu bildirib.
Nazir bəzi ixtisasların strukturunun yenidən nəzərdən keçirilməsinin vacibliyini vurğulayıb: "Məsələn, müəllim ixtisasını nəzərdən keçirək: biz müəllimləri həm kolleclərdə, həm bakalavr səviyyəsində, həm də magistraturada hazırlayırıq. Sual yaranır: bu pillələrin fərqi nədən ibarətdir?"
Emin Əmrullayev magistratura təhsilinin insanlara nə verdiyinin daha dərindən müzakirə edilməli olduğunu deyib. O, bəzi peşələrin artıq aktuallığını itirdiyini, bəzilərinə isə ehtiyac qalmadığını qeyd edərək, müasir təhsil sisteminin yenilənməsinin qaçılmaz olduğunu vurğulayıb: "Əgər bir sistem 50 il mövcud olubsa, bu, o demək deyil ki, 51-ci ildə dəyişdirilə bilməz. Əgər zərurət varsa, onu yeniləmək və təkmilləşdirmək lazımdır".
Nazir qeyd edib ki, təhsil sistemindəki dəyişikliklər mərhələli şəkildə və tədricən həyata keçirilməlidir.
Nihat Tahirov
18:41 06.02.2025
Oxunuş sayı: 6646
