Tibb müəssisələrində yoxlamalar davam edir - Səhiyyə Nazirliyindən AÇIQLAMA
Milli Məclisin yaz sessiyasının ilk plenar iclasında çıxış edən deputat Rəşad Mahmudov bəzi özəl tibb müəssisələrində keyfiyyətsiz və sertifikatsız tibbi xidmətlərin təqdim olunmasından narahatlığını ifadə edib.
Deputatın sözlərinə görə, ölkədə tibb müəssisələrinin yoxlanışlarının dayandırılması gigiyena, xidmət keyfiyyəti və peşəkar standartların aşağı düşməsinə gətirib çıxarıb. O bildirib ki, bəzi özəl klinikalar bu vəziyyətdən sui-istifadə edərək standartlara cavab verməyən tibbi xidmətlər göstərirlər.
Səhiyyə Nazirliyinin Analitik Ekspertiza Mərkəzi (AEM) bəzi özəl tibb müəssisələrində sertifikatsız və keyfiyyətsiz tibbi xidmətlərin göstərilməsi ilə bağlı yayılan iddialara münasibət bildirib. Qurumdan Crossmedia.az-a verilən rəsmi açıqlamada qeyd olunur ki, ölkədə tibb müəssisələrinin yoxlamaları dayandırılmayıb və qanunvericiliyə uyğun olaraq planlı və plandankənar yoxlamalar həyata keçirilir.
Mərkəzin məlumatına görə, yoxlamalar “Sahibkarlıq sahəsində aparılan yoxlamaların tənzimlənməsi və sahibkarların maraqlarının müdafiəsi haqqında” Azərbaycan Respublikasının Qanununa əsasən aparılır.
Planlı yoxlamalar çərçivəsində yoxlanılacaq sahibkarlıq subyektlərinə ən azı 5 iş günü əvvəl rəsmi bildiriş göndərilir. Yoxlamalar zamanı aşkar edilən nöqsanların aradan qaldırılması üçün müvafiq qərarlar qəbul edilərək tibb müəssisələrinin rəhbərliyinə təqdim olunur.
Plandankənar yoxlamalar isə vətəndaşların müraciətləri, yerli dövlət orqanlarının sorğuları və mediada yayılan məlumatlar əsasında təşkil olunur. Bu yoxlamalar da qanunvericilik çərçivəsində həyata keçirilir.
Nəzərinizə çatdırırıq ki, 2024-cü il ərzində AEM tərəfindən ölkənin 44 regionunda 163 planlı yoxlama keçirilib, nəticədə müxtəlif qanun pozuntuları aşkarlanıb və 55 protokol tərtib edilərək, növbəti icraata göndərilib.
Eyni müddətdə ölkənin 29 regionunda 151 plandankənar yoxlama keçirilib, müxtəlif qanun pozuntularına görə 67 protokol tərtib edilərək, növbəti icraata göndərilib.
AEM bildirir ki, yoxlamalar zamanı tibb müəssisələrində lisenziyasız fəaliyyət, qeyri-sertifikatlı personalın işə cəlb edilməsi və digər qanun pozuntuları müəyyən edilib. Bu hallarla bağlı İnzibati Xətalar Məcəlləsinin müvafiq maddələri üzrə hüquqi tədbirlər görülüb.
Səhiyyə Nazirliyi vurğulayır ki, tibb müəssisələrində nəzarət tədbirləri davam etdirilir və qanun pozuntularının qarşısının alınması üçün müvafiq tədbirlər görülməkdədir. Ölkə vətəndaşlarına yalnız qanunvericiliyə uyğun fəaliyyət göstərən tibb müəssisələrinə müraciət etmələri tövsiyə olunur.
Qanun pozuntuları və keyfiyyətsiz tibbi xidmətlə bağlı şikayətlər olduqda, vətəndaşlar Səhiyyə Nazirliyinin müvafiq qurumlarına müraciət edə bilərlər.
Maral Şahverdili
13:40 06.02.2025
Oxunuş sayı: 4574
