TADEF-in əsas məqsədləri açıqlanıb: “Türkiyə və Azərbaycan arasındakı əlaqələri gücləndirmək və...”
Türkiyədə fəaliyyət göstərən Azərbaycan diaspor təşkilatlarını bir araya gətirən Türkiyə Azərbaycan Dərnəkləri Federasiyası (TADEF) yanvarın 17-19-da VII qurultayını keçirib. Qurultayda federasiyanın son iki ildəki fəaliyyəti dəyərləndirilib, nizamnamədə dəyişikliklər edilib və yeni İdarə Heyəti formalaşdırılıb. Tədbirdə Türkiyə və Azərbaycanın rəsmi şəxsləri, millət vəkilləri və diaspor nümayəndələri iştirak ediblər.
Qurultayda yenidən sədr seçilən Ədalət Turan təşkilatın qarşıdakı dövrdə əsas prioritetləri, diaspor fəaliyyətlərinin gücləndirilməsi və Qərbi Azərbaycandan qovulmuş soydaşlarımızın hüquqlarının müdafiəsi istiqamətində planları barədə Crossmedia.az-ın suallarını cavablandırıb.
– Ədalət bəy, Türkiyə Azərbaycan Dərnəkləri Federasiyasının (TADEF) fəaliyyəti nədən ibarətdir?
– TADEF 2006-cı ildə yaradılıb və hazırda Türkiyənin müxtəlif şəhərlərində fəaliyyət göstərən 24 dərnəyi birləşdirir. Federasiyanın əsas məqsədi bu dərnəklərin fəaliyyətini koordinasiya etmək, Türkiyə və Azərbaycan arasındakı əlaqələri gücləndirmək və diaspor fəaliyyətlərini daha səmərəli təşkil etməkdir.
– Bu yaxınlarda TADEF-in 7-ci qurultayı keçirildi. Tədbirin əsas məqsədi nə idi?
– Qurultay federasiyanın ən yüksək qərarverici orqanıdır və iki ildən bir keçirilir. Bu dəfəki toplantımız yanvarın 17-19-da keçirildi. Qurultayın əsas məqsədi federasiyanın əvvəlki dövrdəki fəaliyyətini dəyərləndirmək, nizamnaməyə əlavə və dəyişiklikləri müzakirə etmək, yeni İdarə Heyətini və digər seçkili qurumları formalaşdırmaq idi.
– Qurultayda kimlər iştirak edirdi?
– Qurultayda TADEF-ə üzv olan 24 dərnəkdən 106 nümayəndənin 90-ı iştirak etdi. Bununla yanaşı, Ədalət və İnkişaf Partiyasının millət vəkili, Türkiyə-Azərbaycan Dostluq Qrupunun rəhbəri Şamil Ayrım, Milliyyətçi Hərəkat Partiyasının sədr müavini, Samsun Millət vəkili Prof. Dr. İlyas Topsakkal, digər siyasi partiyaların və QHT-lərin nümayəndələri də tədbirdə yer aldılar.
– Tədbir necə keçdi?
– Qurultay Azərbaycan və Türkiyənin dövlət himnlərinin səsləndirilməsi və şəhidlərin xatirəsinin anılması ilə başladı. Sonra diaspor fəaliyyətlərinə dair videoçarx nümayiş etdirildi, TADEF rəhbərliyinin hesabatı dinlənildi və federasiyanın nizamnaməsinə dəyişikliklər müzakirəyə çıxarılaraq qəbul edildi. Ardınca seçkilər keçirildi və mən yenidən TADEF-in İdarə Heyətinin sədri seçildim.
– Diasporla İş üzrə Dövlət Komitəsinin sədri Fuad Muradov da qurultayda iştirak edirdi. Onun çıxışında hansı məsələlər vurğulandı?
– Fuad Muradov qurultaya qatılaraq yeni seçilmiş İdarə Heyətini təbrik etdi və gələcək fəaliyyət istiqamətləri ilə bağlı tövsiyələrini verdi. Azərbaycan diasporunun daha da gücləndirilməsi, xaricdə milli maraqlarımızın qorunması və soydaşlarımızın həmrəyliyinin vacibliyini vurğulandı.
– Qurultay çərçivəsində hansı mükafatlar təqdim edildi?
– TADEF-in təqdimatı əsasında diaspora fəaliyyətlərinə verdikləri töhfələrə görə bir qrup soydaşımız “Diaspora Medalı” ilə təltif edildi. Mükafat alanlar arasında Milliyyətçi Hərəkat Partiyasının sədr müavini, Samsun Millət vəkili Prof. Dr. İlyas Topsakkal da var idi.
– Nizamnamədə hansı dəyişikliklər edildi?
– Federasiyanın gələcək fəaliyyət istiqamətləri müəyyənləşdirildi. Ən önəmli qərarlardan biri Qərbi Azərbaycandan qovulmuş soydaşlarımızın haqlarının müdafiəsi və onların tarixi torpaqlarına qayıdışı istiqamətində fəaliyyətlərin gücləndirilməsi oldu. Bu məsələ növbəti illərdə TADEF-in prioritetlərindən biri olacaq.
– Son olaraq, TADEF-in gələcək planları barədə nə deyə bilərsiniz?
– Qarşıdakı dövrdə federasiyanın fəaliyyətini daha da genişləndirməyi, Türkiyədəki Azərbaycan diasporunu gücləndirməyi və iki qardaş ölkə arasında əlaqələrin inkişafına töhfə verməyi hədəfləyirik. Xüsusilə, Qərbi Azərbaycan məsələsi, Qarabağda yenidənqurma işləri və Türkiyə-Azərbaycan diaspor təşkilatlarının daha sıx əməkdaşlığı üzərində ciddi işlər görəcəyik.
Maral Şahverdili
13:33 04.02.2025
Oxunuş sayı: 11123
