Əlilliyi olan şəxslərin əl işlərinin satışı üçün xüsusi elektron portal yaradılır
Əlilliyi olan şəxslərin əl işlərinin satışının həyata keçirilməsi xüsusi elektron portal yaradılacaq.
Crossmedia.az xəbər verir ki, bununla bağlı məsələ Milli Məclisin 2025-ci il yaz sessiyasının bu gün keçirilən ilk plenar iclasında müzakirə edilən “Sosial sığorta haqqında” Qanun və Vergi Məcəlləsinə təklif olunan dəyişiklikdə öz əksini tapıb.
Qanun layihəsinə əsasən, əl işlərinin satışını həyata keçirən əlilliyi olan şəxslər portalda qeydiyyatdan keçəcəklər.
Portalda qeydiyyatdan keçmiş əlilliyi olan şəxslər vergi orqanlarında qeydiyyatdan keçmək, vergi hesablamaq, vergi hesabatları tərtib etmək və vergi orqanına təqdim etmək kimi işlərdən azad olacaqlar, bu işlər portal vasitəsilə elektron qaydada onların əvəzinə həyata keçiriləcək.
Əl işlərinin satışından əldə olunan gəlirdən ödəmə mənbəyində 2 % dərəcəsi ilə verginin tutulması təmin ediləcək. Əl işlərinin satışından əldə olunan gəlirdən vergilər çıxıldıqdan sonra əlilliyi olan şəxs üçün açılan bank hesabına köçürüləcək. Həmçinin əl işlərinin satışından əldə olunan gəlirlər məcburi dövlət sosial sığorta haqqı hesablanmayan gəlir növlərinə aid ediləcək.
Qeyd edək ki, layihə ilə əl işlərinin satışını həyata keçirən əlilliyi olan şəxslər üçün yeni vergilər müəyyən olunmur. Hazırda Vergi Məcəlləsində mövcud vergi rejimləri bu kateqoriyadan olan şəxslərin vergi orqanlarında qeydiyyatdan alınması şərti ilə tətbiq olunacaq.
Qanun layihəsi birinci oxunuşda qəbul olunub.
15:57 03.02.2025
Oxunuş sayı: 8423
