Fransanın Azərbaycana qarşı “səlib yürüşü”: “Öz problemlərini unudub”
Fransa uzun illərdir ki, öz dənizaşırı ərazilərində siyasi və sosial böhranlarla üz-üzədir. Yeni Kaledoniya, Qvadelupa və digər bölgələrdə yerli əhali Parisin neomüstəmləkə siyasətinə qarşı çıxır, azadlıq və bərabər hüquqlar tələb edir. Lakin Fransa hökuməti bu çağırışlara cavab vermək əvəzinə, beynəlxalq diqqəti yayındırmaq üçün Azərbaycanı hədəf alan əsassız ittihamlar irəli sürür.
Son illərdə Parisdə hökumət əleyhinə kütləvi etirazlar baş verir, sosial gərginlik artır, lakin rəsmi Paris öz problemlərini həll etmək əvəzinə, Azərbaycanın daxili işlərinə qarışmağa çalışır. Bu dəfə Fransa Senatında Avropa və xarici işlər naziri Jan Noel Baro Azərbaycanın guya Fransanın dənizaşırı ərazilərinə müdaxilə etdiyini iddia edib.
Azərbaycan Xarici İşlər Nazirliyi bu iddiaları dərhal rədd edərək bəyan edib ki, Fransa öz müstəmləkə siyasətini gizlətmək üçün beynəlxalq ictimaiyyəti çaşdırmağa çalışır. Bakı Təşəbbüs Qrupu isə Fransanın bu siyasətini ifşa edən beynəlxalq QHT-lərin fəaliyyətini davam etdirəcəyini vurğulayır.
Maraqlıdır Fransa niyə Azərbaycana qarşı bu cür ittihamlar irəli sürür? Nə üçün Paris neomüstəmləkəçiliyə qarşı çıxan Yeni Kaledoniya əhalisinin səsini boğmağa çalışır? Bu məsələlərin araşdırılması beynəlxalq diplomatiyanın əsas çağırışlarından biridir.
Mövzu ilə bağlı Crossmedia.az-a açıqlama verən Milli Məclisin deputatı Müşfiq Cəfərov bildirir ki, son illərdə Fransanın nəzarəti altında olan və Sakit okeanda yerləşən Yeni Kaledoniyada Parisin müstəmləkəçilik siyasətindən narazılıq ifadə edilən, xalqın hüquqları və muxtariyyətlə bağlı tələblərin irəli sürüldüyü bir sıra etiraz aksiyaları keçirilib.
Deputat qeyd edib ki, təbii sərvətlərlə zəngin olan Yeni Kaledoniya uzun illərdir Fransanın müstəmləkə hakimiyyətinin əsarətindədir: "2018 və 2020-ci illərdə müstəqillik referendumları keçirilməsinə baxmayaraq, müstəqillik məsələləri yerli əhali üçün aktual olaraq qalır. Fransanın Yeni Kaledoniyadakı müstəmləkəçilik siyasəti beynəlxalq ictimaiyyət və bəzi insan hüquqları təşkilatları, eləcə də QHT-lər tərəfindən də tənqid edilir. Onlar Parisi yerli xalqların mədəni və hüquqi xüsusiyyətlərinə yetərincə hörmət etməməkdə ittiham edirlər. Dünyanın ən böyük müstəmləkəçi dövlətlərindən biri olan Fransanın faciəli hadisələrlə, zülm və istismara etirazlarla dolu uzun bir müstəmləkəçilik tarixi var".
M. Cəfərov bildirib ki, Azərbaycan XXI əsrdə Fransanın neokolonializm siyasətinə qarşı çıxış edir. "Bakı Qoşulmama Hərəkatına sədrliyi zamanı da bu məsələni mütəmadi qaldırıb və bir çox ölkənin geniş dəstəyini alıb. Yeni Kaledoniyada baş verənlərlə bağlı məsuliyyəti öz üzərindən atmağa çalışan Paris, eyni zamanda, Azərbaycanın ünvanına ittihamlar səsləndirir və onun küçələrdəki iğtişaşlarda əli olduğunu iddia edir. Lakin bu iddiaları təsdiqləyən heç bir konkret sübut təqdim olunmayıb. Parisin öztəsdiqini tapmayan iddialarını dövlətimiz şər və böhtan olaraq qiymətləndirilir".
Nihat Tahirov
13:18 03.02.2025
Oxunuş sayı: 408
