Zelenski siyasi səhnəyə vida edə bilər: “Təzyiqlərə, tənqidə məruz qalacaq”
Ukrayna Prezidenti Volodimir Zelenski ABŞ lideri Donald Tramp ilə Rusiya dövlət başçısı Vladimir Putinin müharibə ilə bağlı apardıqları danışıqlarda ölkəsinin istisna edilməsini təhlükə hesab edir.
O, bildirib ki, Ukraynanın iştirakı olmadan müharibənin perspektivini, həmçinin mümkün danışıqları müzakirə etmək doğru olmaz.
ABŞ Prezidenti Donald Tramp indiyədək dəfələrlə bildirib ki, o, ən qısa zamanda müharibəni bitirə bilər. Hətta bunun üçün yüz gün vaxt verilib.Vaxt keçir. Hər ötən gün ABŞ liderinin qoyduğu müddət yaxınlaşır. Buna paralel olaraq rəsmi Kiyevin də narahatlığı artır.
Mümkün danışıqlarla bağlı Crossmedia.az-a danışan siyasi şərhçi Turab Rzayev Ukrayna Prezidenti Volodimir Zelenskinin Qərbin yeni solçu siyasətçilərindən olduğunu bildirib: “Bununla bağlıdır ki, o, ABŞ-nin keçmiş prezidenti Cozef Bayden, Fransa lideri Emmanuel Makronla daha çox anlaşırdı. Ağ Evin hazırkı rəhbəri Donald Trampla işləmək isə Zelenski üçün çətin olacaq. Hazırkı məqamda Ukrayna müharibəni davam etdirmək istəyir. Çünki savaşın arzuolunmaz nəticələrlə başa çatması Zelenskinin siyasi karyerasının bitməsi və ya bir şəxsi kimi təzyiqlərə, tənqidə məruz qalması, hətta, ola bilsin, məsuliyyətə cəlb olunması deməkdir. Savaş rəsmi Kiyevin xeyrinə başa çatmaması sual yaradacaq: Niyə Ukrayna müharibəyə ehtiyac olmadan Rusiya ilə razılaşmadı?”.
T.Rzayevin sözlərinə görə, Zelenskinin narahatlığı əbəs deyil: “ABŞ Ukraynaya dəstəyi azaltsa, yaxud dayandırsa, bütün yük Avropa İttifaqının (Aİ) üstünə düşəcək: “Aİ isə bütün yükün altından çıxa bilməyəcək. Artıq bəzi Aİ dövlətləri, o cümlədən Macarıstan bununla bağlı mənfi msajlar verirlər. Yəni ABŞ olmayacağı təqdirdə Aİ-nin dəstəyi yarımçıq və müvəqqəti xarakter daşıyacaq”.
Kənan Novruzov
13:04 03.02.2025
Oxunuş sayı: 5449
