Putin hansını seçəcək?: Nüvə silahını, yoxsa sülhü - Açıqlama
Rusiya-Ukrayna müharibəsində artıq əsəblərin tarıma çəkildiyini desək, yanılmarıq. Belə ki, bir tərəfdən sülh məsələsi tədircən gündəmə gəldiyi halda, digər tərəfdən hər ötən gün nüvə müharibəsi ehtimalı yaxınlaşır. Rusiyanın nüvə silahını hər an tətbiq etməsi ehtimalı ən azından nəzəri baxımından mümkündür. Praktik baxımından isə bu, hələ ki, o qədər də real görünmür.
Türkiyəli siyasi şərhçi, professor Mehmet Yüce sözügedən ehtimalla bağlı Crossmedia.az-a danışıb.
O, bildirib ki, Qərbin, o cümlədən ABŞ-nin Ukraynaya silah və sursat dəstəyini artırmasından sonra Rusiya balanslaşdırma siyasəti çərçivəsində nüvə silahından istifadə məsələsini gündəmə gətirib: “Bu təhlükə bütün dünyada narahatlıqla qarşılanıb. Rusiyanın nüvə silahından istifadə ehtimalının çox mürəkkəb və qeyri-müəyyən məsələ olduğunu söyləmək mümkündür. Belə bir qərarın qəbulu çox çətindir və bir çox amillərdən asılıdır.
Məlum olduğu kimi, Rusiya nüvə silahı ilə bağlı strateji çəkindirmə siyasəti aparır. Yəni demək olar ki, bu silahlardan istifadə etməkdə əsas məqsəd digər dövlətləri Rusiyaya qarşı ciddi hücumdan çəkindirməkdir. Lakin bütün dünyada nüvə silahından istifadənin nəticələri çox dağıdıcı olduğundan belə bir addımın atılma ehtimalı son dərəcə aşağıdır. Xüsusilə, Donaald Trampın ABŞ prezidenti seçildikdən sonra apardığı siyasət Rusiya-Ukrayna müharibəsinin nəhayət ki, dayanacağından xəbər verir”.
Siyasi şərhçinin sözlərinə görə, Rusiya nüvə silahından istifadə etsə, bu, bütün dünyada ciddi və dağıdıcı nəticələrə səbəb olacaq: “İlk növbədə nüvə silahından istifadə qlobal fəlakətə və ciddi insan itkisinə səbəb olacaq. Nüvə silahları çox böyük dağıdıcı gücə malikdir və bir neçə saniyə ərzində bir bölgənin böyük əhalisini öldürməyə qadirdir. Digər tərəfdən, Rusiyanın nüvə silahından istifadə etməsi digər ölkələri cavab tədbirləri görməyə sövq edə bilər. Bu, nüvə müharibəsinin başlanmasına səbəb ola bilər.
Böyük bir nüvə münaqişəsi başlasa, bu, təkcə bir regiona deyil, bütün dünyaya təsir göstərəcək. Digər tərəfdən, nüvə silahları ətraf mühiti daimi olaraq məhv edən radioaktiv çirklənmə yaradır. Bunan görə də nüvə silahının istifadəsinin qarşısını almaq üçün daim səylər göstərilir və beynəlxalq diplomatiya bu istiqamətdə güclü şəkildə istifadə olunur”.
Kənan Novruzov,
Fidan Hacızadə
23:23 31.01.2025
Oxunuş sayı: 14155
