Azərbaycandan ABŞ-a “İşlərimizə qarışmayın” mesajı - AÇIQLAMA
Azərbaycan Xarici İşlər Nazirliyinin mətbuat katibi Ayxan Hacızadə ABŞ-nin Bakıdakı səfirliyinin iddialarına cavab verib. Crossmedia.az xəbər verir ki, bu barədə diplomat sosial şəbəkədə yazıb.
“Bəxtiyar Hacıyevə qarşı qanuni məhkəmə qərarı işdəki çoxsaylı sübutlara əsaslanır və məhkəmə prosedurlarına xarici müdaxilə qəbuledilməzdir. Maraqlıdır ki, eyni növ vergi fırıldaqçılığı və maliyyə cinayətləri Amerika Birləşmiş Ştatlarında dəfələrlə ciddi şəkildə cəzalandırılır və həbs müddəti 30 ilə qədər çata bilər, nə üçün bu ölkə digər ölkələrdə belə cinayətlərə qarşı verilən cəzadan narazıdır.
Görünür ki, belə bir yanaşma qanunun aliliyinin əhəmiyyətinin artırılmasından daha çox siyasi maraqlara əsaslanır”, – o qeyd edib.
ABŞ-ın Azərbaycanın daxili işlərinə qarışmağı haqlı olaraq narazılıq yaradıb. Bununla bağlı rəsmi qurumlar, siyasi-ictimai şəxslər etiraz edirlər. Halbuki ABŞ-nin özündə daxili problemlər kifayət qədərdir. Belə olanda Vaşinqtonun demokratiya adı altında digər ölkələrin daxili işlərinə qarışması başa düşülən deyil.
Bu barədə Crossmedia.az-a danışan Milli Məclisin deputatı Aydın Mirzəzadə rəsmi Bakının Vaşinqtona cavabını müsbət qiymətləndirib:
“Azərbaycan daxili siyasətini ölkə Konstitusiyasına və qanunlarına əsasən müəyyən edir. Eyni zamanda, istənilən məhkəmə prosesi də ilk növbədə qanunlara əsaslanır. Bu baxımdan, digər ölkələrin Azərbaycanın daxili siyasətinə və məhkəmə proseslərinə dair fikir bildirməsi diplomatik qaydalara uyğun gəlmir. Hesab edirəm ki, istənilən ölkə Azərbaycanın daxili siyasətinə və daxildə baş verən proseslərə hörmətlə yanaşmalıdır”.
“Azərbaycan demokratik bir dövlətdir və qanunlarımız beynəlxalq hüquq normalarına uyğundur. Vətəndaşlarımızın hüquq və azadlıqlarının qorunması üçün beynəlxalq təcrübələrdən istifadə etməklə bütün lazımi tədbirlər həyata keçirilir. Hər bir şəxsin məhkəmə prosesinə dair fikir bildirmək isə diplomatik normalara uyğun gəlmir. Üstəlik, məhkəmə prosesi açıq şəkildə keçirilib və bütün sübutlar tam şəkildə nəzərdən keçirilib”, - parlamentari əlavə edib.
Fidan Hacızadə
07:26 15.01.2025
Oxunuş sayı: 9045
