Sanders: Amerikalıların 63 faizi hamı üçün tibbi sığortanı dəstəkləyir
ABŞ senatoru Berni Sanders amerikalıların 63 faizinin “Medicare for All” – hamı üçün dövlət tibbi sığortası proqramını dəstəklədiyini bildirib.
Crossmedia.az xəbər verir ki, Berni Sanders bu barədə açıqlamasında “The Wall Street Journal”ın sorğu nəticələrinə istinad edib.
Senator qeyd edib ki, 15-20 il əvvəl bu təşəbbüs barədə danışarkən amerikalıların əksəriyyəti proqramın mahiyyətindən xəbərsiz idi və ona ictimai dəstək məhdud idi.
“15-20 il əvvəl hamı üçün tibbi sığorta haqqında danışanda insanlar bunun nə olduğunu bilmirdilər. Proqram o qədər də böyük dəstəyə malik deyildi”, – deyə Sanders bildirib.
Onun sözlərinə görə, son illərdə vəziyyət dəyişib və dövlət tərəfindən maliyyələşdirilən universal tibbi sığorta ideyasına maraq artıb.
Sanders Demokratlar Partiyasının rəhbərliyinə də müraciət edərək səhiyyə islahatları ilə bağlı təşəbbüslərini davam etdirəcəyini vurğulayıb.
“Biz Demokratlar Partiyasının rəhbərliyinə imtina edə bilməyəcəyi bir təklif təqdim edəcəyik”, – deyə senator bildirib.
Qeyd edək ki, “Medicare for All” təşəbbüsü ABŞ-də bütün vətəndaşları və digər ölkə sakinlərini əhatə edən vahid dövlət tibbi sığorta sisteminin yaradılmasını nəzərdə tutur.
15:53 29.10.2026
Oxunuş sayı: 45
