Diasporla İş üzrə Dövlət Komitəsi XII Bakı Beynəlxalq Kitab Sərgisində təmsil olunub
21–27 oktyabr tarixində Bakı Ekspo Mərkəzində Mədəniyyət Nazirliyinin təşkilatçılığı ilə XII Bakı Beynəlxalq Kitab Sərgisi keçirilib. Sərgidə Azərbaycan Respublikasının Diasporla İş üzrə Dövlət Komitəsi də təmsil olunub.
Crossmedia.az xəbər verir ki, 30 xarici ölkədən 59 təşkilatın və 147 yerli qurumun qatıldığı tədbirdə Komitənin və onun nəzdində fəaliyyət göstərən Azərbaycan Diasporuna Dəstək Fondunun dəstəyi ilə son illərdə nəşr olunan kitablar, jurnallar, elektron nəşrlər və digər çap məhsulları nümayiş etdirilib.
Təqdim olunan nəşrlər Azərbaycan həqiqətlərinin və milli-mədəni irsimizin təbliğinə, ölkəmizin mədəniyyətinin beynəlxalq ictimaiyyətə tanıdılması baxımından əhəmiyyət daşıyıb. Onların arasında müxtəlif dillərə tərcümə edilən Azərbaycan nağılları, hekayələri və digər bədii əsərlər də yer alıb.
Sərgi müddətində Komitənin guşəsinə baş çəkən yerli və xarici qonaqlara qurumun fəaliyyət istiqamətləri, Azərbaycan həqiqətlərinin və mədəniyyətinin xaricdə təbliği, dünya azərbaycanlıları ilə əlaqələrin möhkəmləndirilməsi istiqamətində həyata keçirilən layihələr barədə məlumat verilib. Tədbir çərçivəsində ziyarətçilərə Azərbaycan ədəbiyyatını və milli-mədəni irsimizi tanıdan bir sıra kitablar da hədiyyə edilib.
12:33 29.10.2026
Oxunuş sayı: 25
