İstanbuldan Minskə uçuşlar yenidən başlayır
Türkiyənin milli aviadaşıyıcısı “Turkish Airlines” İstanbul və Minsk arasında uçuşları bərpa etməyə hazırlaşır. Bu addımın iki ölkə arasında iqtisadi və ticarət əlaqələrinin genişlənməsinə təkan verəcəyi gözlənilir.
Crossmedia.az xəbər verir ki, bu barədə Türkiyənin Xarici İqtisadi Əlaqələr Şurasının (DEİK) Türkiyə-Belarus İşgüzar Şurasının sədri Fatih İşık “Anadolu” agentliyinə açıqlamasında bildirib.
Onun sözlərinə görə, birbaşa uçuşların bərpası avtomobil sənayesi, maşınqayırma, enerji avadanlıqları və istehsal texnologiyaları sahələrində yeni əməkdaşlıq imkanları yaradacaq.
İşık qeyd edib ki, Belarusun sənaye infrastrukturu ilə Türkiyənin istehsal və ixrac potensialının birləşdirilməsi birgə müəssisələrin yaradılmasına və üçüncü ölkələrin bazarlarına çıxışa şərait yarada bilər.
Bununla belə, beynəlxalq sanksiyalar səbəbindən maliyyələşdirmə, ödəniş sistemləri və logistika sahələrində müəyyən çətinliklərin mövcud olduğu vurğulanıb.
Şura sədri bildirib ki, tərəflər alternativ dəmir yolu marşrutlarından istifadənin genişləndirilməsini, Türkiyənin dövlət banklarının Belarusda filial açmasını və sanksiyalara məruz qalmayan məhsullar üzrə yeni ödəniş mexanizmlərinin yaradılmasını müzakirə edirlər.
Bundan başqa, Belarusun Mogilyov Azad İqtisadi Zonasında Türkiyə investorları üçün xüsusi şərtlərlə istehsal müəssisələrinin yaradılması imkanları nəzərdən keçirilir. Təkliflər arasında hər kvadratmetr üçün təxminən 1,5 dollar icarə haqqı da yer alır.
Fatih İşık bildirib ki, əsas məqsəd hazırda 2 milyard dollar səviyyəsində olan Türkiyə-Belarus ticarət dövriyyəsini 3–4 milyard dollara çatdırmaqdır.
13:32 12.10.2026
Oxunuş sayı: 51
