Amerika

Las-Veqasda Tramp oteli qarşısında Tesla partladı: keçmiş əsgərdən "oyanış çağırışı"

Las-Veqasda yerləşən Donald Tramp oteli qarşısında 1 yanvar səhəri baş verən partlayış böyük səs-küy yaradıb.

Crossmedia.az xəbər verir ki, Tesla markalı avtomobilin partlaması nəticəsində avtomobilin sürücüsü ölüb, yaxınlıqda olan 7 nəfər isə yüngül xəsarət alıb. Hadisə yerində həyatını itirən şəxs ABŞ ordusunun keçmiş hərbçisi Metyu Alan Livelsberqer olub.

"Bu, terror aktı deyil, oyanış çağırışıdır"

Məlum olub ki, Metyu Alan Livelsberqer partlayışdan əvvəl bir sıra qeydlər edib. O, bu qeydlərində baş verənləri "oyanış çağırışı" adlandırıb.

“Amerikalılar yalnız zorakılığa və nümayişlərə reaksiya verir. Mənim fikirlərimi çatdırmaq üçün partlayışdan daha təsirli bir yol varmı?” - deyə o, öz qeydlərində yazıb.

Hərbçi keçmişdə itirdiyi döyüş yoldaşlarını və gördüyü dəhşətləri unutmağa çalışdığını bildirib. Bundan əlavə, Livelsberqer qeydlərində ABŞ-ın “məhvə doğru irəlilədiyini” və Ukrayna müharibəsinə dair fikirlərini də bölüşüb.

"Bu, psixoloji problemləri olan bir şəxsin faciəsidir"

Federal Təhqiqatlar Bürosunun (FBI) nümayəndəsi Spenser Evans bildirib ki, bu hadisə terror aktı yox, posttravmatik stress pozuntusundan (PTSP) əziyyət çəkən bir şəxsin həyatına son qoyma cəhdi kimi qiymətləndirilir.

Clark dairəsinin şerifi Kevin Makməhillin sözlərinə görə, Metyu Alan Livelsberqer partlayışdan bir qədər əvvəl tapança ilə özünə atəş açıb. Onun cəsədinin yanında silah aşkarlanıb.

Hadisə yerində aparılan ilkin istintaq zamanı Livelsberqerin hərbi xidmətdən sonra psixoloji problemlər yaşadığı və bu səbəbdən belə bir addım atdığı ehtimal olunur.

Hadisə ilə bağlı araşdırma davam edir.

Emil Bağızadə