Britaniya əhalisinə evdə ərzaq saxlamağı tövsiyə edib
Britaniya hökumətinin yüksək səviyyəli rəsmisi ölkədə güclü hava şəraitinə hazırlaşmaq üçün ev təsərrüfatlarına ərzaq ehtiyatı toplamağı tövsiyə edib.
Crossmedia.az xarici mediaya istinadən xəbər verir.
Ətraf mühit üzrə dövlət katibi Angela İql Sakit okean üzərində bir nəsildə ən güclü El-Ninyo hadisəsinin inkişaf etdiyini və bunun Britaniyada daha ekstremal fırtınalara səbəb ola biləcəyini bildirib.
Onun sözlərinə görə, qarşıdakı dövrdə ölkədə yayların daha quraq, qışların isə daha yağışlı keçməsi, həmçinin güclü fırtınaların artması gözlənilir. İql Asiyada daşqınların daha ciddi fəsadlara səbəb ola biləcəyini də qeyd edib.
Nazir bildirib ki, fövqəladə vəziyyət zamanı xilasedici xidmətlər çatana qədər ailələrin müəyyən qədər ərzaq ehtiyatının olması onların vəziyyətini xeyli yaxşılaşdıra bilər.
Britaniyanın Milli Audit Ofisi (NAO) isə ölkənin ərzaq təchizatı zəncirinin iqlim böhranı, ekstremal hava şəraiti, kiberhücumlar, eləcə də bitki və insan xəstəliklərinin yayılması səbəbindən risk altında olduğunu açıqlayıb.
NAO hökumətin ərzaq təchizatında yaranan fasilələrin aradan qaldırılması üçün özəl sektordan həddindən artıq asılı olduğunu bildirib. Qurumun məlumatına görə, mümkün problemlər ərzaq qiymətlərinin artmasına və həssas əhali qruplarının ərzaq almaqda çətinlik çəkməsinə səbəb ola bilər.
Britaniya hökumətinin ilin sonuna qədər fövqəladə vəziyyətlərə hazırlıqla bağlı yeni strategiya təqdim etməsi gözlənilir. Sənəddə ekstremal hava şəraiti və ya kiberhücumlar nəticəsində ərzaq və su çatışmazlığı yaranacağı təqdirdə ailələrin ata biləcəyi addımlar da əks olunacaq.
20:10 04.09.2026
Oxunuş sayı: 44
