ABŞ-ın hava hücumundan müdafiə ehtiyatları tükənir
ABŞ-ın hava hücumundan müdafiə sistemləri Yaxın Şərqdəki müharibə fonunda ciddi sınaqla üzləşib. Ölkənin Patriot və THAAD sistemləri ballistik raketlərə qarşı effektiv olsa da, onların ehtiyatları sürətlə azalır.
Crossmedia.az xəbər verir ki, The Telegraph-ın məlumatına görə, ABŞ Yaxın Şərqdəki müharibə zamanı Patriot üçün topladığı raket ehtiyatının təxminən üçdə ikisini, THAAD sistemlərinin isə 40 faizini istifadə edib.
Məlumata görə, ABŞ hazırda ildə təxminən 650 Patriot və 96 THAAD raket-interseptoru istehsal edə bilir. Lakin mövcud istehsal tempi genişmiqyaslı raket hücumları zamanı ehtiyatların sürətlə bərpası üçün kifayət etməyə bilər.
Nəşr qeyd edir ki, bu vəziyyət Vaşinqtonun Rusiya, İran, Çin və Şimali Koreya kimi ölkələrdən yarana biləcək mümkün raket təhdidlərinə qarşı uzunmüddətli müdafiə imkanları ilə bağlı suallar yaradır.
Patriot və THAAD sistemlərinin effektivliyi yüksək olsa da, onların bahalı və məhdud sayda olan raket-interseptorlardan istifadə etməsi ABŞ-ın hava hücumundan müdafiə ehtiyatlarının davamlılığı məsələsini gündəmə gətirib.
21:40 16.08.2026
Oxunuş sayı: 56
