Dəmir yolu üçün süni intellektə 50 milyon avro yatıracaq
Almaniyanın dəmir yolu operatoru "Deutsche Bahn" qatarların gecikməsi ilə bağlı sərnişinlərə daha dəqiq məlumat vermək üçün süni intellekt texnologiyalarına 50 milyon avro sərmayə yatıracağını açıqlayıb.
Crossmedia.az xəbər verir ki, "Deutsche Bahn" bu barədə məlumat yayıb.
Şirkətin İdarə Heyətinin sədri Evelin Palla bildirib ki, ayrılan vəsait müasir İT texnologiyalarının və süni intellekt həllərinin inkişafı və tətbiqinə yönəldiləcək.
Onun sözlərinə görə, bu investisiya sayəsində sərnişinlərin məlumatlandırılması daha etibarlı, operativ və keyfiyyətli olacaq.
2027-ci ilədək həyata keçirilməsi nəzərdə tutulan proqram çərçivəsində Kiana adlı süni intellekt əsaslı virtual köməkçi hazırlanacaq. Bu sistem istifadəçilərə səfərləri ilə bağlı fərdiləşdirilmiş məlumat təqdim edəcək.
Qeyd edək ki, "Deutsche Bahn" son illər köhnəlmiş infrastruktur, qatarların tez-tez gecikməsi və reyslərin ləğv olunması səbəbindən tənqidlərə məruz qalıb. Bu problemlərlə əlaqədar Almaniya hökuməti dəmir yolu şəbəkəsinin modernləşdirilməsi proqramına start verib.
17:02 08.07.2026
Oxunuş sayı: 50
