"Suriya xalqı öz gələcəyi ilə bağlı qərarlar verə bilər" - Açıqlama
Hər şey noyabrın 27-də Suriyanın hakimiyyət əleyhinə olan qüvvələrinin Hələb və İdlib əyalətlərində hökumət qüvvələrinə qarşı genişmiqyaslı əməliyyatları ilə başladı. Proseslərin irəliləməsi Əsəd rejiminin sonlanması ilə nəticələndi. Baş verənlərin ardınca, hakimiyyəti ələ alan Suriya silahlı müxalifətinin komandanlığı Əbu Muhəmməd Əl-Colani Dəməşqdəki Əməvi məscidində çıxış edərək, ölkədə baş verənləri bütün xalqın qələbəsi adlandırıb. O, "Bu qələbə regionda yeni tarixin başlanğıcı olacaq" - deyə qeyd edib. Sual doğur: Suriyada hər şeyin indi başladığını deyə bilərikmi?
Mövzu ilə bağlı politoloq Sultan Zahidov Crossmedia.az-a açıqlamasında qeyd edib ki, Əsəd hakimiyyəti sözün əsl mənasında, yarım əsrdən çox ali hakimiyyət idi:
"Uzun illərdir Suriyada eyni rejimin olması, ölkənin siyasəti, mövqeyinin dəyişməz olaraq irəlilədiyinin göstəricisidir. Bu ölkənin xalqı uzun müddət ərzində repressiv qanunlara məruz qalıb. Elə Hafiz Əsədin dövründə sünni üsyançılara qarşı qırğınların həyata keçirilməsi, 2011-ci ildə "Ərəb Baharı" nın Suriyada baş verməsi, bu xalqın Əsəd rejimindən boğaza yığıldığını sübut edirdi. Nəticədə, faktiki olaraq Suriya parçalandı və bu ərazilərdə müxtəlif ölkələrin maraqlarına xidmət edən fərqli-fərqli hərbi qruplaşmalar, xaos, anarxiya hakim oldu. Artıq belə bir vəziyyət dəyişdi, Əsəd hakimiyyəti devrildi.
Bununlada, Suriya xalqının öz gələcəyi ilə bağlı qərarlar verməsi üçün şərait yarandı. Lakin bu ölkə üzərində bir sıra dövlətlərin kirli oyunlarının bitəcəyi demək deyil".
Əsəd hakimiyyəti devrilişinin bu qədər sürətli olmasında bir neçə faktor yer alır:
"İlk olaraq, Əsəd hakimiyyətinin artıq əvvəlki qüvvətinin olmaması bu sırada qeyd olunandır. Belə ki, 13 il ölkə vətəndaş müharibəsinə qərq olub, 2015-ci ildə Rusiyanın gücü ilə öz müqavimətini qoruya bilib. Lakin son illər Rusiyanın Ukrayna ilə apardığı müharibəyə köklənməsi, İsrailin bu ərazilərə müdaxilələri və müxalif qüvvələrin hərbi-texniki cəhətdən Türkiyə, ABŞ kimi dövlətlər vasitəsilə təmin edilməsi məhz sözügedən rejimi sonlandıran məqamlardandır".
Aytac Kərimova
13:37 16.12.2024
Oxunuş sayı: 11455
