III Milli Pediatriya Konqresi başa çatdı
III Milli Pediatriya Konqresi başa çatıb.
Crossmedia.az xəbər verir ki, 12-14 dekabr tarixlərində keçirilən III Milli Pediatriya Konqresi bu gün öz işini uğurla yekunlaşdırdı. Səhiyyə Nazirliyinin dəstəyi və Azərbaycan Pediatriya Cəmiyyətinin təşkilatçılığı ilə keçirilən konqresdə 300-dən çox həkim iştirak edib. Konqresin əsas məqsədi pediatriya sahəsindəki ən son yenilikləri müzakirə etmək, uşaqların sağlamlığının qorunması və müalicəsi məsələlərində təcrübə mübadiləsi aparmaq idi.
Konqres ümumilikdə 7 paneldən ibarət olub. Son günündə 4-cü, 5-ci, 6-cı və 7-ci panellər keçirilib, burada müxtəlif aktual pediatriya mövzuları müzakirə edilib.
4-cü paneldə “Genetika və pediatriya” mövzusu müzakirə olundu. Paneldə PhD. Cand. Dr. Günay Əmirli və Phd. Dr. Zakir Bayramov uşaqlarda fenotipik göstəricilər və genetik xəstəliklərin erkən diaqnostikasını diqqətə çatdırdılar.
5-ci panel "Uşaqlarda naməlum mənşəli qızdırmanın səbəbləri" mövzusunda keçirildi. Bu paneldə çıxış edənlər arasında Dr. Leyla Xələfova, Dr. Vəfa Quliyeva və Dr. Rəşad Tağıyev yer alırdı.
6-cı panel isə "Uşaq və ətraf mühit amilləri" mövzusunda aparıldı. Burada Dr. Mehriban Hüseynova "Ev heyvanları və uşaqlarla təmas" mövzusunda danışaraq, heyvanlarla uşaqların təmasında əsasən psixoloji tərəfləri vurğuladı. Ev heyvanlarından keçmə ehtimalı olunan xəstəlikləri və onlardan qorunma üsulları haqqında da geniş məlumat verdi. Dos. Nigar Bayramova "İqlim dəyişikliyinin uşaqlara təsiri" mövzusundan danışdı. O, bir çox iqlim məsələlərinə toxundu. Qlobal isinmənin bir çox səbəblərindən danışaraq bunların aradan qaldırılması üçün bir çox metod tövsiyə edərək iştirakçılara birlik üçün müraciət etdi.
Və bu panelin sonuncu məruzəçisi Azərbaycan Respublikası Dövlət Gömrük Komitəsinin Tibbi
Xidmət idarəsi rəisinin müavini, Azərbaycan Tibb Universitetinin dosenti Dr. İsmayıl Əfəndiyev "Ağır metallar və uşaq sağlamlığı" mövzusunda maraqlı məruzə ilə çıxış etdi. O, uşaqların sağlamlığına təsir edən ağır metalların mənbələrindən biri kimi civədən nümunələr çəkdi. Hətta xatirələrindən özünün uşaq vaxtı civəni içdiyindən də danışdı, buda mövzuya olan şəxsi baxışını daha da maraqlı etdi.
Konqresin 7-ci panelində Pediatriyada aktual mövzular əsas müzakirə predmetinə çevrildi. Dr. Qismət Quliyev, Dr. Aysel Xəlilbəyli, Dr. Günay Rəsulova və Dr. Uğur Zeynallı pediatriyada qarşıya çıxan cari məsələlər və problemlər barədə müzakirələr apardılar.
Pediatriya sahəsindəki müasir çağırışlar və uşaq sağlamlığının qorunması məsələləri üzərində aparılan bu əhəmiyyətli müzakirələr, həmçinin səhiyyə sistemindəki yeniliklərin tətbiqi və uşaqların sağlamlığını qorumağa yönəlmiş fəaliyyətlər, konqresin əsas nəticələrindən oldu.
Sevinc Abuşova
14:06 14.12.2024
Oxunuş sayı: 11939
