ABŞ İranla müharibədə "JASSM-ER" raketlərinin qıtlığı ilə üzləşib
ABŞ ordusu İranla davam edən hərbi əməliyyatların ilk həftələrində yüksək dəqiqlikli "JASSM-ER" qanadlı raketlərinin ehtiyatının böyük hissəsini sərf edib.
Bu barədə crossmedia.az xarici KİV-ə istinadən xəbər verir. "Bloomberg" agentliyinin məlumatına görə, döyüşlər zamanı 1000-dən çox raket istifadə olunub ki, bu da müharibədən əvvəlki 2300 ədədlik arsenalın təxminən üçdə ikisini təşkil edir. Hazırda ABŞ-ın sərəncamında cəmi 425 ədəd bu növ raketin qaldığı bildirilir.
Pentaqon rəsmiləri yaranmış vəziyyətdən ciddi narahatlıq keçirirlər, çünki hazırkı istehsal sürəti ilə (ildə təxminən 860 raket) ehtiyatların tam bərpası illər aparacaq. Qeyd olunur ki, təkcə "JASSM-ER" deyil, həmçinin "Tomahawk" və "Patriot" sistemləri üçün nəzərdə tutulan raketlərin də sürətlə tükənməsi ABŞ-ın qlobal hərbi hazırlığına təhdid yaradır. "JASSM-ER" raketləri təyyarənin hava hücumundan müdafiə zonasına girmədən 960 km məsafədəki komanda məntəqələrini, anbarları və aerodromları məhv etmək qabiliyyətinə malik strateji silah hesab olunur. Hazırda ABŞ hərbi rəhbərliyi yüksək dəqiqlikli silahların istehsal həcmini artırmaq üçün sənaye nəhəngləri ilə təcili məsləhətləşmələr aparır.
23:20 05.04.2026
Oxunuş sayı: 48
