Müharibənin pərdəarxası: ABŞ İranla niyə döyüşə girdi?
Dünən ABŞ Senatında keçirilən dinləmələrdə ölkənin kəşfiyyat rəhbərliyi İranla müharibənin əsaslandırılması ilə bağlı ciddi suallar yaradıb. ABŞ Milli Kəşfiyyat direktoru Tulsi Gabbard bildirib ki, İranın nüvə proqramı hələ 2025-ci ildə həyata keçirilən “Operation Midnight Hammer” əməliyyatı nəticəsində “tamamilə məhv edilib” və o vaxtdan bəri Tehranın bu istiqamətdə hər hansı bərpa cəhdi müşahidə olunmayıb.
Crossmedia.az xəbər verir ki, bu barədə TRT Word telekanalı məlumat yayıb.
Onun sözlərinə görə, ABŞ kəşfiyyat icması İranın yaxın zamanda nüvə təhlükəsi yaratdığı qənaətinə gəlməyib. Bu isə ABŞ və İsrailin Tehrana qarşı hərbi əməliyyatları əsaslandırmaq üçün irəli sürdüyü “təxirəsalınmaz nüvə təhlükəsi” iddiaları ilə ziddiyyət təşkil edir.
Senatda çıxış edən senator Con Ossoff Gabbarddan birbaşa soruşub ki, hücumlardan əvvəl İran real və yaxın nüvə təhlükəsi yaradırdımı. Gabbard isə bu suala konkret cavab verməkdən yayınıb və bildirib ki, “təxirəsalınmaz təhlükənin olub-olmamasını yalnız prezident müəyyən edə bilər”.
Digər senator Mark Varner isə Gabbardı prezidentin mövqeyinə zidd olan məlumatları çıxışında səsləndirməməkdə ittiham edib. Dinləmələr zamanı həmçinin qeyd olunub ki, İranın dövlət strukturları ümumilikdə qorunub qalsa da, ABŞ və İsrailin hücumları nəticəsində ölkənin hərbi potensialı ciddi şəkildə zəifləyib.
Bununla belə, ekspertlər hesab edir ki, Tehran uzunmüddətli perspektivdə raket və dron imkanlarını bərpa edə bilər.
Müzakirələr ABŞ kəşfiyyatı ilə siyasi qərarvericilər arasında fikir ayrılığının mövcud olduğunu və İranla müharibə qərarının arxasında duran səbəblərlə bağlı sualların hələ də açıq qaldığını göstərir.
Fatimə
09:42 19.03.2026
Oxunuş sayı: 42
