Britaniyanın Dəniz Ticarət Əməliyyatları Agentliyi (UKMTO) Hörmüz boğazında təhlükəli insidentin baş verdiyini açıqlayıb.
Crossmedia.az bu barədə xarici mediaya istinadən xəbər verir.
Məlumata görə, Omanın şimalından təxminən 16 dəniz mili məsafədə bir neçə silahlı gəmi ticarət gəmisini mühasirəyə alaraq dayanmağı tələb edib.
Agentliyin bildirdiyinə görə, hədəf alınan gəmi verilən əmrlərə məhəl qoymayıb və planlaşdırılmış marşrutu ilə hərəkətini davam etdirib. Hadisə ilə bağlı UKMTO tərəfindən araşdırma aparılır. Hazırda gəminin hansı ölkəyə məxsus olduğu açıqlanmayıb.
Bəyanatda vurğulanıb ki, Hörmüz boğazı ətrafından keçən bütün gəmilərə maksimum ehtiyatla hərəkət etmək, şübhəli fəaliyyət müşahidə edildiyi halda isə dərhal UKMTO-ya məlumat vermək tövsiyə olunur.
