İstanbulda keçirilməsi planlaşdırılan İran–ABŞ danışıqlarında ABŞ prezidenti Donald Trampın xüsusi nümayəndəsi və kürəkəni Cared Kuşner, eləcə də bölgədəki altı ölkənin xarici işlər nazirləri iştirak edəcək.
Crossmedia.az xəbər verir ki, bu barədə "The Washington Post" qəzeti yazıb.
Qəzet yazır ki, danışıqlarda İran tərəfini xarici işlər naziri Abbas Əraqçı, ABŞ tərəfini isə prezidentin xüsusi nümayəndəsi Stiv Uitkof təmsil edəcək.
Məlumata görə, regional iştirakçılar sırasında Türkiyə, Qətər, Misir, Səudiyyə Ərəbistanı, Oman və Pakistanın xarici işlər nazirlərinin iştirakı planlaşdırılır.
“The Washington Post”un yazdığına görə, bu səviyyədə beynəlxalq və regional iştirak ABŞ və İran nümayəndələri arasında birbaşa danışıqların başlanmasına zəmin yarada bilər. Qəzetə danışan regional rəsmilərdən biri bildirib ki, Kuşnerin və digər ölkə nazirlərinin iştirakı dialoqun formatını genişləndirmək və prosesə əlavə siyasi çəki qazandırmaq məqsədi daşıyır.
Eyni mənbənin sözlərinə görə, regional ölkələrin əsas hədəfi danışıqların yalnız nüvə məsələsi ilə məhdudlaşdırılması və daha geniş siyasi gündəliyə keçməməsidir.
